చిన్న సినిమా కానీ.. "కంటెంట్"తో ఏడిపించేశారయ్యా !!
ఇటీవలి కాలంలో తెలుగు ప్రేక్షకులు గ్రామీణ నేపథ్యంలో సాగే కథలకు మంచి ఆదరణ చూపిస్తున్నారు. ముఖ్యంగా 80లు, 90ల కాలాన్ని ప్రతిబింబించే సినిమాలు ప్రేక్షకులను నాస్టాల్జియాలో ముంచెత్తుతున్నాయి. అదే తరహాలో రూపొందిన చిత్రం 'దూరదర్శని'. దర్శకుడు కార్తికేయ కొమ్మి తెరకెక్కించిన ఈ చిత్రాన్ని వరాహ మూవీ మేకర్స్ బ్యానర్పై జయశంకర్ రెడ్డి ఎం, పాటి మీది సంతోష్ నిర్మించారు. సువిక్షిత్ బొజ్జ, గీతిక రతన్ ప్రధాన పాత్రల్లో నటించిన ఈ సినిమా ఈరోజు (మే 15, 2026)న ప్రేక్షకుల ముందుకు వచ్చింది. మరి ఈ ప్రేమకథ ప్రేక్షకులను ఎంతవరకు కదిలించిందో మీకోసం ప్రత్యేకంగా..
కథ:
1990ల కాలంలో మట్టిపర్రు అనే పల్లెటూరిలో కథ సాగుతుంది. ఆ ఊరిలో ఒకే ఒక్క దూరదర్శన్ టీవీ ఉండటం.. ఆ టీవీ చుట్టూ గ్రామస్థులు గుమిగూడటం అప్పటి రోజులను గుర్తుచేస్తుంది. హరి (సువిక్షిత్) టీవీ చూడటానికి వెళ్లిన సమయంలో వాణి (గీతిక రతన్)ను చూసి ప్రేమలో పడతాడు. ఇద్దరికీ ఒకరిపై ఒకరికి ఇష్టం ఉన్నప్పటికీ, తమ ప్రేమను వ్యక్తపరచుకోలేరు. ఇక గ్రామంలో ప్రభావశీలుడిగా తిరిగే పేకబాబు (భాస్కర్) కూడా వాణిపై మనసు పడతాడు. హరి-వాణి ప్రేమ విషయం తెలిసిన తర్వాత వారిని విడదీయడానికి కుట్రలు మొదలుపెడతాడు. వాణి అన్న పరశురామ్ (విజయ్ కృష్ణారెడ్డి)ను రెచ్చగొట్టి కుల వివాదాలకు ఆజ్యం పోస్తాడు. ప్రేమ, పరువు, కులం, గ్రామ రాజకీయాల మధ్య చిక్కుకున్న ఈ జంట కథ ఎలాంటి మలుపులు తిరిగింది? ప్రేమ గెలిచిందా? లేక పరువు హత్యలే చివరి మాటగా మారాయా? అనేదే మిగతా కథ.
ఎలా ఉందంటే:
'దూరదర్శని' సినిమా ప్రధాన బలం దాని నాస్టాల్జిక్ ఫీల్. యాంటెన్నా సరిచేస్తూ టీవీ సిగ్నల్ పట్టుకోవడం, గ్రామం మొత్తం ఒకే ఇంట్లో టీవీ చూడటానికి చేరుకోవడం, చూపులతో ప్రేమించుకునే రోజుల్ని దర్శకుడు సహజంగా చూపించాడు. ముఖ్యంగా నేటి హడావుడి ప్రేమకథలకు భిన్నంగా, స్వచ్ఛమైన ప్రేమను ఈ చిత్రం అందంగా చూపించే ప్రయత్నం చేసింది. ఫస్ట్ హాఫ్ మొత్తం ప్రేమ, స్నేహం, గ్రామ జీవితం చుట్టూనే సాగుతుంది. హీరో స్నేహితుల కామెడీ, అమాయక ప్రేమ సన్నివేశాలు ఆకట్టుకుంటాయి.
ఇంటర్వెల్ బ్లాక్ తర్వాత కథ ఒక్కసారిగా సీరియస్ టోన్లోకి మారిపోతుంది. రెండో భాగంలో కుల వివక్ష, పరువు హత్యలు, గ్రామ పెద్దల ఒత్తిళ్లు వంటి అంశాలను భావోద్వేగంగా చూపించారు. క్లైమాక్స్ విషాదంగా ముగిసినా, చివర్లో వచ్చే ట్విస్ట్ మాత్రం ప్రేక్షకుల హృదయాలను కదిలిస్తుంది. ప్రేమ కోసం చేసే త్యాగాన్ని దర్శకుడు ఎమోషనల్గా ప్రెజెంట్ చేశాడు. ముఖ్యంగా పరువు పేరుతో జరిగే దారుణాలను ఈ సినిమా బలంగా ప్రశ్నిస్తుంది.
మైనస్ ఇదే..
అయితే ఈ సినిమా ప్రధాన సమస్య దాని నెమ్మదైన కథనం. కొన్ని సన్నివేశాలు అవసరానికి మించి సాగిన భావన కలుగుతుంది. సంభాషణలు చాలా చోట్ల పాతతరహాలో ఉండటం యువ ప్రేక్షకులకు కనెక్ట్ కాకపోవచ్చు. భారీ డైలాగులు ఉన్నప్పటికీ వాటిని మోసేంత బలమైన సన్నివేశాలు కొన్నిచోట్ల కనిపించవు. అలాగే దర్శకుడు తీసుకున్న భావోద్వేగ అంశాన్ని ఇంకాస్త రియాలిస్టిక్గా, షార్ప్గా చూపించి ఉంటే సినిమా మరింత బలంగా నిలిచేది. కొన్ని సన్నివేశాల్లో ఎడిటింగ్ మరింత క్రిస్ప్గా ఉండాల్సిన అవసరం కనిపిస్తుంది.
నటీనటుల పనితీరు:
హరి పాత్రలో సువిక్షిత్ బొజ్జ చాలా సహజంగా నటించాడు. అతని నటనలో ఒక అమాయకత్వం కనిపిస్తుంది. ముఖ్యంగా ప్రేమ సన్నివేశాల్లో అతని హావభావాలు పాతకాలపు హీరో ఉదయ్ కిరణ్ను గుర్తు చేస్తాయి.
వాణిగా గీతిక రతన్ అద్భుతంగా ఒదిగిపోయింది. పల్లెటూరి అమ్మాయి అమాయకత్వాన్ని చాలా నేచురల్గా చూపించింది.
భాస్కర్ పోషించిన పేకబాబు పాత్ర సినిమాలో ప్రత్యేక ఆకర్షణగా నిలుస్తుంది. విలనిజం, ఈర్ష్య, గ్రామ రాజకీయాలను అతను బాగా చూపించాడు.
పరశురామ్ పాత్రలో విజయ్ కృష్ణారెడ్డి ఆకట్టుకోగా, హీరో ఫ్రెండ్స్ పాత్రల్లో తేజ విహాన్, బాలరాజు పులుసు, పాండు మంచి వినోదాన్ని అందించారు. ముఖ్యంగా బాలరాజు పాత్ర నవ్వులతో పాటు భావోద్వేగాలను కూడా పంచుతుంది.
సాంకేతిక విభాగం:
సినిమాకు సంగీతం పెద్ద ప్లస్ పాయింట్. పాటలు సాహిత్యపరంగా హృదయానికి హత్తుకునేలా ఉన్నాయి. నేపథ్య సంగీతం భావోద్వేగ సన్నివేశాలను మరింత ఎలివేట్ చేసింది. సినిమాటోగ్రఫీ గ్రామీణ అందాలను అద్భుతంగా చూపించింది. ప్రతి ఫ్రేమ్లోనూ ఒక కవితాత్మకత కనిపిస్తుంది.
నిర్మాణ విలువలు బాగుండగా, దర్శకుడు ఎంచుకున్న కథలో నిజాయితీ స్పష్టంగా కనిపిస్తుంది. అయితే స్క్రీన్ప్లే మరింత వేగంగా ఉండి ఉంటే సినిమా ఇంకాస్త ప్రభావం చూపేదని అనిపిస్తుంది.
రేటింగ్: 2.5/5
Click it and Unblock the Notifications
Sign in with Google