మహేష్ బాబు వారసుడికి ఈ చిక్కు తప్పదా?
ప్రముఖ నటుడు, టాలీవుడ్ సూపర్ స్టార్ మహేష్ బాబు కుమారుడు గౌతమ్ ఘట్టమనేని ఇప్పటివరకు ఒక్క చిత్రంలో కూడా నటించకపోయినప్పటికీ.. సినిమా ఇండస్ట్రీలో తనకంటూ ఓ ప్రత్యేక గుర్తింపును సంపాదించుకున్నారు. ప్రముఖ మూవీ రివ్యూ ప్లాట్‌ఫామ్ 'లెటర్‌బాక్స్‌డ్(Letterboxd)" ద్వారా ఆయన ఇచ్చే సినిమా రివ్యూలే ఇందుకు కారణం. యష్ నటించిన 'టాక్సిక్', నాని 'ది ప్యారడైజ్'వంటి భారీ సినిమాలపై గౌతమ్ కుండబద్ధలు కొట్టినట్లు ఇచ్చిన నిష్పాక్షికమైన అభిప్రాయాలు సినీ ప్రేమికుల్లో పెద్ద ఎత్తున చర్చనీయాంశమయ్యాయి.
అయితే ఇందులో ఓ ఇంట్రెస్టింగ్ అంశం ఉంది. ఓ సీరియస్ మూవీ ప్రేమికుడిగా ఆయనకు ప్రత్యేక ఇమేజ్ ను తెచ్చి పెట్టిన ఈ సమీక్షలే.. భవిష్యత్తులో ఆయన కథానాయకుడిగా తెరంగేట్రం చేసేటప్పుడు ఆయనపై ప్రభావం చూపే అవకాశం ఉందని విశ్లేషకులు భావిస్తున్నారు. సాధారణంగా ఓ కొత్త నటుడు సినిమా ఇండస్ట్రీలోకి అడుగుపెడుతున్నప్పుడు ఆ సినిమా, లాంచ్ ఈవెంట్ లేదా వారి వెనుకున్న స్టార్ ఫ్యామిలీ నేపథ్యం ఆధారంగా గుర్తింపు లభిస్తుంది. కానీ గౌతమ్ విషయానికి వస్తే.. ఆయనకు అదనంగా మరో ఇమేజ్ ఉంది. ఇతర సినిమాలను ఆయన ఎంత నిశితంగా పరిశీలిస్తారో, ఎలా రేటింగ్ ఇస్తారో ప్రపంచానికి ఇప్పటికే తెలుసు. ఇది ఆయన రాబోయే ఎంట్రీని మరింత ఆసక్తికరంగా మార్చడంతో పాటు కొంత సంక్లిష్టంగా కూడా మారుస్తోంది.
ఓ సాధారణ ప్రేక్షకుడిగా ఇతర సినిమాలపై అంత కఠినంగా విమర్శలు చేసినప్పుడు, రేపు ఆయన నటించే మొదటి సినిమా విషయంలో కూడా ప్రేక్షకులు అంతే కఠినంగా వ్యవహరించే అవకాశం ఉంది. సినిమాలో కనిపించే ప్రతి చిన్న లోపం, ఎడిటింగ్ లోపాలు లేదా నిరాశపరిచే సీన్లను ఆయన గతంలో ఇతర చిత్రాలపై చెప్పిన రివ్యూలతో పోల్చి చూస్తారు. మహేష్ బాబు కుమారుడిగా లభించే గుర్తింపు ఒకెత్తయితే.. ఆయన ఇచ్చిన రివ్యూల వల్ల ప్రేక్షకులు ఆయన నటనను మరింత లోతుగా విశ్లేషించడానికి ఓ కారణం దొరికినట్లవుతుంది.
అయితే కేవలం సినిమాలు బాగా చూసే వ్యక్తి అయినంత మాత్రాన మంచి నటుడు అయిపోరు. అలాగే ఇతరుల చిత్రాలపై స్పష్టమైన అభిప్రాయాలు ఉన్నంత మాత్రాన, తనపై వచ్చే విమర్శలను స్వీకరించలేరని కూడా అనుకోలేము. ప్రస్తుతానికి గౌతమ్ సినీ అరంగేట్రానికి సంబంధించి ఎలాంటి అధికారిక ప్రకటన రాలేదు. కానీ మహేష్ బాబు కుమారుడు వెండితెరపై మొదటిసారి అడుగుపెట్టినప్పుడు, ప్రజలు కేవలం ఆయన కుటుంబ నేపథ్యాన్నే కాకుండా, నటుడిగా మారకముందే ఆయనను పాపులర్ చేసిన ఆ రివ్యూలను ఖచ్చితంగా గుర్తుంచుకుంటారు.
Click it and Unblock the Notifications
Sign in with Google
