జూబ్లీహిల్స్‌లో కనీ వినీ ఎరగని రీతిలో బాలయ్య కొత్త ఇల్లు
దాదాపు నాలుగు దశాబ్దాల పాటు ఎన్నో చారిత్రాత్మక రాజకీయ పరిణామాలు, అభిమానుల కోలాహలానికి వేదికగా నిలిచిన బంజారాహిల్స్ నివాసానికి నందమూరి బాలకృష్ణ వీడ్కోలు పలకనున్నారు. హైదరాబాద్ నగరంలో రోజురోజుకూ పెరుగుతున్న ట్రాఫిక్ ఇబ్బందులకు శాశ్వత పరిష్కారం చూపేందుకు ప్రభుత్వం చేపట్టిన రోడ్డు విస్తరణ ప్రాజెక్టు కోసం, తన కుటుంబానికి అత్యంత సెంటిమెంట్‌గా ఉన్న పాత ఇంటి స్థలంలో కొంతభాగాన్ని ఆయన స్వచ్ఛందంగా అప్పగించారు. ఈ నేపథ్యంలో జూబ్లీహిల్స్ ప్రాంతంలో ఆయన నిర్మిస్తున్న సరికొత్త అల్ట్రా లగ్జరీ భవంతి ప్రస్తుతం టాలీవుడ్, రాజకీయ వర్గాల్లో హాట్ టాపిక్‌గా మారింది.
ఇల్లు కట్టించి ఇచ్చిన నాన్న
దివంగత ముఖ్యమంత్రి, విశ్వవిఖ్యాత నవరస సార్వభౌమ ఎన్టీ రామారావు స్వయంగా 1982లో తన కుమారుడు బాలకృష్ణ కోసం బంజారాహిల్స్ రోడ్ నంబర్ 45లో ఈ నివాసాన్ని నిర్మించి ఇచ్చారు. అప్పట్లో ఎన్టీఆర్ ఇక్కడి నుంచే రాజకీయ వ్యూహాలు రచించేవారు, అభిమానులను కలిసేవారు. అయితే, పార్క్ చుట్టూ ట్రాఫిక్ కష్టాలు తీర్చేందుకు జీహెచ్‌ఎంసీ చేపట్టిన ఎలివేటెడ్ కారిడార్, రోడ్డు విస్తరణ పనులకు ఈ నివాస ప్రాంగణంలోని 862.77 చదరపు గజాల స్థలం అడ్డంకిగా మారింది. ప్రజా ప్రయోజనాలను దృష్టిలో ఉంచుకున్న బాలకృష్ణ, ఎలాంటి అభ్యంతరం చెప్పకుండా ఆ స్థలాన్ని ప్రభుత్వానికి ఇచ్చేందుకు అగ్రగామిగా ముందుకు వచ్చి తన పెద్ద మనసు చాటుకున్నారు.
వీఐపీ జోన్ లో..
పాత ఇంటిలో సభాభాగం కోల్పోవాల్సి వస్తుండటంతో, కుటుంబ సభ్యుల కోసం జూబ్లీహిల్స్‌లోని అత్యంత ప్రతిష్టాత్మకమైన వీఐపీ జోన్‌లో బాలకృష్ణ ఒక సరికొత్త భవంతిని నిర్మిస్తున్నారు. ప్రముఖుల నివాసాలకు అతిసమీపంలో ఈ ప్రాపర్టీ రూపుదిద్దుకుంటోంది. ఇప్పటికే ల్యాండ్ వాల్యూ, అత్యాధునిక నిర్మాణ వ్యయం, విదేశీ హంగులు అన్నీ కలుపుకుంటే ఈ సరికొత్త విలాసవంతమైన ఆస్తి విలువ సుమారు రూ. 100 కోట్లకు పైగానే ఉంటుందని రియల్ ఎస్టేట్ నిపుణులు అంచనా వేస్తున్నారు.
10వేల చదరపు అడుగులు
దాదాపు 10,000 చదరపు అడుగుల విశాలమైన స్థలంలో గ్రౌండ్ ఫ్లోర్‌తో పాటు రెండు అంతస్తులుగా ఈ అద్భుతమైన భవనం నిర్మాణం పూర్తికావచ్చింది. సెలబ్రిటీల జీవనశైలికి తగినట్లుగా ఇందులో పలు ప్రత్యేక వసతులను ఏర్పాటు చేశారు. అకౌస్టిక్స్, సరౌండ్ సౌండ్ టెక్నాలజీతో కూడిన ప్రత్యేక ప్రైవేట్ ప్రివ్యూ థియేటర్, అధునాతన ఫిట్‌నెస్ పరికరాలతో పర్సనల్ జిమ్, రిలాక్సేషన్ కోసం స్విమ్మింగ్ పూల్ ఉన్నాయి. అలాగే ప్రశాంత వాతావరణాన్ని పంచే విశాలమైన ల్యాండ్‌స్కేప్ గార్డెన్, సంప్రదాయబద్ధంగా తీర్చిదిద్దిన పూజా మందిరం, సినీ చర్చలు, అతిథుల రాకపోకల కోసం ప్రత్యేక లాంజ్ ప్రాంతాలు ప్రత్యేక ఆకర్షణగా నిలుస్తున్నాయి. ఈ గృహానికి సంబంధించిన ఆర్కిటెక్చర్, ఇంటీరియర్ డిజైనింగ్ పనులను బాలయ్య సతీమణి వసుంధరా దేవి స్వయంగా దగ్గరుండి పర్యవేక్షిస్తున్నారు. తెలుగు సంప్రదాయ రాజసం ఉట్టిపడేలా, ఆధునిక విలాసాలు కనువిందు చేసేలా ప్రతి గదిని తీర్చిదిద్దారు. ప్రస్తుతం నిర్మాణ పనులు తుది దశకు చేరుకోవడంతో, త్వరలోనే ఈ సరికొత్త లగ్జరీ ప్యాలెస్‌లోకి నందమూరి కుటుంబం అడుగుపెట్టనుంది.
Click it and Unblock the Notifications
Sign in with Google
