నేను రంగంలోకి దిగితే అందరూ దొరికిపోతారు.. సందీప్ కిషన్ వార్నింగ్!

Sundeep Kishan: సినిమాలపై సోషల్ మీడియాలో నెగెటివ్ ప్రచారం జరగడం కొత్తేమీ కాదు. సినిమా విడుదలకు ముందు, తర్వాత కొందరు పోస్టులు, ట్వీట్ల ద్వారా తమ అభిప్రాయాలను వ్యక్తం చేస్తుంటారు. అయితే ఉద్దేశపూర్వకంగా టార్గెట్ చేస్తూ నెగెటివ్ క్యాంపెయిన్ నిర్వహిస్తున్నారని ఆరోపణలు వచ్చినప్పుడు మాత్రం విషయం హాట్ టాపిక్‌గా మారుతుంది. తాజాగా హీరో సందీప్ కిషన్ చేసిన ఓ సోషల్ మీడియా పోస్ట్.. ఇటు టాలీవుడ్‌లో అటు కోలీవుడ్ లో చర్చనీయాంశంగా మారింది. ఇంతకీ ఏం జరిగిందంటే?

యంగ్ హీరో సందీప్ కిషన్ లేటెస్ట్ మూవీ 'సిగ్మా'పై గత కొన్ని రోజులుగా యాంటీ ట్వీట్లు వస్తున్నాయని పేర్కొన్నారు. అంతేకాదు, ఈ ప్రచారం వెనుక ఎవరున్నారో తనకు తెలుసని, ఇందుకోసం ఎవరు డబ్బులు చెల్లిస్తున్నారో కూడా తనకు సమాచారం ఉందని ఆయన తన పోస్ట్‌లో చెప్పుకొచ్చారు. అయితే ఎవరెవరి పేర్లను మాత్రం సందీప్ కిషన్ వెల్లడించలేదు. దీంతో అసలు ఈ నెగెటివ్ ప్రచారం వెనుక ఎవరున్నారు? అనే చర్చ సోషల్ మీడియాలో మొదలైంది.

'డైరెక్ట్‌గా వెళ్తే అందరూ దొరికిపోతారు'
తనను, తన సినిమాను టార్గెట్ చేస్తున్న వారికి సందీప్ కిషన్ స్ట్రాంగ్ కౌంటర్ ఇచ్చారు. ఇలాంటి ప్రచారం చేస్తున్నవారికే తన కంటే ఎక్కువ నష్టం జరిగే అవకాశం ఉందని హెచ్చరించారు. తాను నేరుగా రంగంలోకి దిగితే ఈ వ్యవహారం వెనుక ఉన్న ప్రతి ఒక్కరూ దొరికిపోతారని, 'చూసుకోండి' అంటూ ఓపెన్ ఛాలెంజ్ చేశారు. అయితే సందీప్ కిషన్ చేసిన ఆరోపణలకు సంబంధించి ఆయన ఎలాంటి ఆధారాలను బహిరంగంగా వెల్లడించలేదు. అలాగే ఆయన పేర్కొన్న వ్యక్తులు ఎవరో కూడా స్పష్టత లేదు. ప్రస్తుతం ఆయన వ్యాఖ్యలు వైరల్‌గా మారాయి.\

'సిగ్మా' రిలీజ్‌కు ముందు ఎందుకు హాట్ టాపిక్?
ఇదంతా 'సిగ్మా' విడుదలకు ముందు చోటుచేసుకోవడం మరింత ఆసక్తికరంగా మారింది. తమిళ స్టార్ హీరో విజయ్ కుమారుడు జాసన్ సంజయ్ దర్శకుడిగా పరిచయమవుతున్నారు. ఈ సినిమాలో సందీప్ కిషన్ హీరోగా నటించారు. ఫరియా అబ్దుల్లా కథానాయికగా కనిపించనున్నారు. లైకా ప్రొడక్షన్స్ బ్యానర్‌పై సుభాస్కరన్ నిర్మించిన ఈ సినిమాకు ఎస్. థమన్ సంగీతం అందించారు. యాక్షన్ అడ్వెంచర్ హీస్ట్ జానర్‌లో 'సిగ్మా' తెరకెక్కింది. సంపత్ రాజ్ కీలక పాత్రలో నటించారు. రూ.500 కోట్ల డీల్, నిధుల వేట, మాఫియా నేపథ్యంలో కథ సాగుతుందని ప్రచార చిత్రాల ద్వారా తెలుస్తోంది. జాసన్ సంజయ్ తొలి సినిమా కావడంతో దీనిపై ఆసక్తి నెలకొంది.

మరోవైపు ఇటీవల కొన్ని సినిమాల విడుదలకు ముందు సోషల్ మీడియాలో నెగెటివ్ ప్రచారం జరిగిన సందర్భాలు కూడా చర్చకు వచ్చాయి. అయితే ప్రతి నెగెటివ్ ట్వీట్‌ను పెయిడ్ క్యాంపెయిన్‌గా భావించలేం. ప్రేక్షకుల సహజ అభిప్రాయాలు, విమర్శలు కూడా సోషల్ మీడియాలో కనిపిస్తుంటాయి. ఈ నేపథ్యంలో సందీప్ కిషన్ చేసిన వ్యాఖ్యలు ఎలాంటి పరిణామాలకు దారితీస్తాయో, ఆయన చెప్పినట్లుగా ఎవరైనా ఈ ప్రచారం వెనుక ఉన్నారా అనేది మాత్రం భవిష్యత్తులోనే క్లారిటీ వచ్చే అవకాశం ఉంది.

I see a lot of targeted anti Tweets coming at me & my film over the last few days lol
I know exactly the people behind this & paying for this as well…
Just reminding you that you have more to lose than me..
Direct ayipithe andaru dorikipitharu mari.. choosukondi :)

— Sundeep Kishan (@sundeepkishan) October 1, 2026