యష్, రణ్ వీర్ సింగ్ మల్టీస్టారర్..? ధురంధర్ దర్శకుడితో..

కేజీఎఫ్ సిరీస్ తో పాన్ ఇండియా రేంజ్ లో మంచి గుర్తింపు తెచ్చుకున్నారు కన్నడ రాకింగ్ స్టార్ యష్. కేజీఎఫ్ 2 భారీ బ్లాక్ బస్టర్ హిట్ తర్వాత దాదాపు నాలుగేళ్లు గ్యాప్ తీసుకుని గీతూ మోహన్ దాస్ దర్శకత్వంలో టాక్సిక్ అనే మూవీతో ప్రేక్షకుల ముందుకు వచ్చారు. అయితే ఈ మూవీ బాక్సాఫీస్ వద్ద ఆశించినంత విజయాన్ని సాధించలేకపోయింది. యష్ తో పాటు ఈ మూవీలో నయనతార, కియారా ఆడ్వాణీ, తారా సుతారియా, రుక్మిణి వసంత్ కీలక పాత్రల్లో కనిపించారు. ఇలా భారీ తారాగణంతో తెరకెక్కిన ఈ పాన్ ఇండియా గ్యాంగ్ స్టర్ డ్రామా ప్రేక్షకులను మెప్పించడంలో విఫలం అయింది. అయితే ఈ సినిమాలో యష్ నటన మాత్రం ఆకట్టుకుంది.

టాక్సిక్ తర్వాత పెద్దగా గ్యాప్ తీసుకోకుండానే ప్రతిష్టాత్మక చిత్రం 'రామాయణ' తో ప్రేక్షకుల ముందుకు వచ్చారు యష్. ఈ మూవీ దీపావళి కానుకగా నవంబర్ 5న విడుదలైంది. ఈ మూవీలో యష్ రావణాసురుడిగా నటించి అలరించారు. రావణుడిగా తన స్క్రీన్ ప్రజెన్స్ తో ప్రేక్షకులకు మర్చిపోలేని అనుభూతిని కలిగించారు యష్. ఇక సాక్ నిల్క్ అందించిన నివేదిక ప్రకారం.. విడుదలైన 6 రోజుల్లోనే ప్రపంచవ్యాప్తంగా రామాయణ మూవీకి రూ.900 కోట్లకు పైగా కలెక్షన్లు వచ్చాయి. ఇందులో రూ.500 కోట్లకు పైగా నెట్ వసూళ్లు ఒక్క భారత్ లోనే రావడం గమనార్హం.

ఇక రామాయణ పార్ట్ 2 లో యష్ విశ్వరూపం చూపించబోతున్నట్లు స్పష్టం అవుతోంది. మరోవైపు యష్ మరో పాన్ ఇండియా ప్రాజెక్ట్ లో ఛాన్స్ కొట్టేసినట్లు సమాచారం అందుతోంది. ఇటీవల ధురంధర్ సినిమాతో సంచలన విజయం సాధించిన దర్శకుడు ఆదిత్య ధర్ తదుపరి సినిమాలో యష్- ధురంధర్ హీరో రణ్ వీర్ సింగ్ కాంబోలో ఓ భారీ మల్టీ స్టారర్ సినిమా రెడీ అవుతున్నట్లు సమాచారం అందుతోంది. ఆదిత్య ధర్ తెరకెక్కించబోయే చంద్రగుప్త మౌర్య అనే సినిమాలో వీరిద్దరూ నటిస్తున్నట్లు వార్తలు వస్తున్నాయి. అయితే దీనిపై త్వరలోనే అధికారిక ప్రకటన వెలువడనున్నట్లు సమాచారం అందుతోంది.