చిరంజీవిలో మార్పు

రాజకీయాల్లో గతంలోని చిరంజీవికి ఇప్పటి చిరంజీవికి చాలా మార్పు కనిపిస్తుంది. ఇంతకు ముందు ఆయన ప్రసంగాల తీరుకు, వాచకానికి, హావభావాలకు ఇప్పటి తీరుకు పొంతనే లేదు. ప్రస్తుతం చేస్తున్న ప్రజాచైతన్య యాత్రలో ఈ మార్పు స్పష్టంగా కనిసిప్తోంది. ఇంతకు ముందు బిగబట్టినట్లు మాట్లాడేవారు. వాచకంలో తేడా ఉండేది కాదు. హావభావాల ప్రదర్శన ఉండేది కాదు. మొత్తంగా చిరంజీవి స్వేచ్ఛగా వ్యవహరిస్తున్నట్లు అనిపించేది కాదు. సినిమాల్లో ఆయన మెగా హీరో కావడానికి, రాజకీయాల్లో ప్రభావం ఎక్కువగా చూపించకపోవడానికి ఆ తేడానే కారణం కావచ్చు. సినిమాల్లో ఆయన నటన, హావభావాల ప్రదర్సనలో ఎక్కడా తెచ్చిపెట్టుకున్న పద్దతి కనిపించదు. రాజకీయాల్లో మాత్రం ఆయన తెచ్చి పెట్టుకున్నట్లు మాట్లాడుతూ వచ్చారు.

ప్రస్తుతం ఆయన తీరు మారింది. బహుశా, రాజకీయాల్లో ఏమి మాట్లాడవచ్చో, ఏమి మాట్లాడకూడదో, ఎలా వ్యవహరించాలో తెలిసి రావడం వల్ల అది జరిగి ఉండవచ్చు. అలాగే, కాంగ్రెసుతో స్నేహం కుదిరిన తర్వాత తనకు సరైన భద్రత చేకూరిందే విశ్వాసం కూడా అందుకు కారణం కావచ్చు. వైయస్ జగన్ కు చెక్ పెట్టి చిరంజీవిని చేరదేసేందుకు కాంగ్రెసు పార్టీ అధిష్టానం ఈ మేరకు నిర్ణయం తీసుకుందని, ఆ విషయం చిరంజీవికి కాంగ్రెసు అధ్యక్షురాలు సోనియా గాంధీ స్వయంగా చెప్పారని అంటున్నారు. ఈ స్థితిలోనే ఆయన కాంగ్రెసు కడప పార్లమెంటు సభ్యుడు వైయస్ జగన్ ను టార్గెట్ చేస్తూ ఆయన తీవ్రమైన వ్యాఖ్యలు చేశారు. ఆ వ్యాఖ్యలతో ఆయన తీవ్రమైన దుమారమే రేపారు. ఇంతకు ముందైతే చిరంజీవి అలా మాట్లాడడానికి వెనకాడి ఉండేవారు కావచ్చు. కానీ, కాంగ్రెసు అధిష్టానం అండదండలు ఉండడంతో ఆయన అందుకు వెనకాడలేదని అంటున్నారు.

కాగా, ఆయనకు అధికారం కూడా చాలా దగ్గరలోనే కనిపిస్తున్నట్లుంది. వైయస్ జగన్ వెళ్లిపోవడం, చిరంజీవి రావడం కాంగ్రెసులో త్వరలో జరిగే పరిణామమని ఊహిస్తున్నారు. అలా జరిగినప్పుడు చిరంజీవి ముఖ్యమంత్రి అయ్యే అవకాశాలు లేకపోలేదని అంటున్నారు. ఈ వాతావరణంలోనే ఆయన కడప జిల్లాలో కూడా పర్యటన పెట్టుకున్నారు. వైయస్ జగన్ సొంత జిల్లా కడపలో ఆయన తన ఆరోపణల ధాటిని తగ్గించలేదు. ఏ మాత్రం తడబాటు లేకుండా, ఫ్రీగా ఆయన మాట్లాడుతున్నారు. వాక్యాలు వాక్యాలు ఆయన నోటి నుండి వెలువడుతున్నాయి. ఇది ప్రజలను ఆకర్షించే అవకాశం ఉంది. రాజకీయాలకు చిరంజీవి పనికి రాడనే వారిని ఆలోచింపజేసే విధంగా ఉందని అంటున్నారు.