వైయస్ జగన్ ఒక్కడు కాడు

కాంగ్రెసు కడప పార్లమెంటు సభ్యుడు వైయస్ జగన్ తిరుగుబాటుకు కృతనిశ్చయంగా ఉన్నట్లు తెలుస్తోంది. సాక్షి టీవీ చానెల్ ప్రసారం బుధవారం ఉదయం ప్రసారం చేసిన వార్తాకథనం ఈ విషయాన్ని తెలియజేస్తోంది. వైయస్ జగన్ తనకు ఓదార్పు యాత్రలో లభించిన ప్రజాదరణను చూసి ముందుకే సాగాలని, పార్టీ అధిష్టానం ఒత్తిళ్లకు తలొగ్గకూడదని నిర్ణయించుకున్నట్లు సమాచారం. అందుకు అనుగుణంగా ఆయన తిరుగుబాటుకు సిద్ధమయ్యారని అంటున్నారు. జగన్ ఒక్కడు కాదు, జగన్ ఒంటరి కాదంటూ సాక్షి చానెల్ తన వార్తాకథనంలో వ్యాఖ్యానించింది. అయితే ఒక్క జగన్ చుట్టూ వంద కుట్రలు సాగుతున్నాయని విమర్శించింది. దీన్ని బట్టి వైయస్ జగన్ తన నిర్ణయాన్ని ప్రకటించినట్లు అర్థం చేసుకోవచ్చు. శిశిపాలుని పాపాలు పండినట్లు వంద తప్పు జరిగితే తన సహనం నశిస్తుందని ఆయన నెల్లూరు ఓదార్పు యాత్ర ముగింపు సభలో అన్నారు. దీన్ని బట్టి కాంగ్రెసులోని తన ప్రత్యర్థులు లేదా పార్టీ అధిష్టానం వంద తప్పులు చేసినట్లు, తాను సహనం కోల్పోయే సమయం వచ్చినట్లు ఆయన భావిస్తూ ఉండాలి.

వైయస్ జగన్ కు వ్యతిరేకంగా రోజుకో రాజకీయం, పూటకో పన్నాగం జరుగుతోందని సాక్షి టీవీ చానెల్ వ్యాఖ్యానించింది. వైయస్ జగన్ కు వ్యతిరేకంగా ప్రత్యర్థుల పాచికలు పారలేదని కూడా అభిప్రాయపడింది. వైయస్ జగన్ కు వ్యతిరేకంగా ఎందుకు, ఎవరు కుట్రలు చేస్తున్నారనే విషయంపై కూడా వ్యాఖ్యానించింది. వైయస్ జగన్ వర్గం కాంగ్రెసులోని సీనియర్ నేతలు, ముఖ్యంగా తెలంగాణ నేతలను టార్గెట్ చేసుకుంది. వి హనుమంతరావు, కె. కేశవరావు, రాయపాటి సాంబశివ రావు వంటి నాయకులపై ధ్వజమెత్తుతోంది. వైయస్ జగన్ వర్గానికి చెందిన శాసనసభ్యురాలు కొండా సురేఖ, అంబటి రాంబాబు, గోనె ప్రకాశరావు వంటి నాయకులు చేస్తున్న ప్రకటనలు వైయస్ జగన్ తిరుగుబాటు కార్యాచరణను ధ్వనిస్తున్నారు.

వైయస్ జగన్ ను టార్గెట్ చేసుకున్న నేతలు ఇంతకు ముందు ఏ విధమైన పార్టీ వ్యతిరేక కార్యకలాపాలకు పాల్పడ్డారో, వారిపై ఎందుకు చర్యలు తీసుకోలేదో ప్రశ్నించడానికి వైయస్ జగన్ వర్గం సిద్ధమైంది. అటువంటి నాయకుల జాబితాను కూడా వైయస్ జగన్ వర్గం తయారు చేసింది. పార్టీ అధిష్టానంపై ఏ విధమైన వ్యాఖ్యలు చేయని వైయస్ జగన్ పై ఏ విధంగా చర్యలు తీసుకుంటారని ప్రశ్నిస్తున్నారు. ప్రస్తుతం బెంగళూర్ లో ఉన్న వైయస్ జగన్ శుక్రవారం హైదరాబాద్ వచ్చే అవకాశం ఉంది. ఆ తర్వాత అసమ్మతి రాజకీయాలు అసెంబ్లీ వేదికగా ఊపందుకునే అవకాశం ఉంది.