తెలంగాణ విమోచన హంగామా

తెలంగాణ విమోచన దినోత్సవంపై రాజకీయ పార్టీలు నానా హంగామా చేస్తున్నాయి. సెప్టెంబర్ 17వ తేదీ తెలంగాణ విమోచన దినోత్సవాన్ని ప్రభుత్వ అధికారికంగా నిర్వహించాలని తెలంగాణ రాష్ట్ర సమితి (తెరాస) డిమాండ్ చేస్తోంది. ప్రభుత్వం మెడలు వంచేందుకు పోరాటం చేస్తామని కూడా హెచ్చరిస్తోంది. తెరాస డిమాండ్ కు కాంగ్రెసు, తెలుగుదేశం తెలంగాణ నాయకులు వంత పాడుతున్నారు. అంతేకాదు, కొంత మంది సీమాంధ్ర నాయకుల మద్దతు కూడా లభిస్తోంది. రాయలసీమ కాంగ్రెసు సీనియర్ శాసనసభ్యుడు జెసి దివాకర్ రెడ్డి దాన్ని వ్యతిరేకించారు. దాంతో ఆయనపై వివిధ పార్టీల నాయకులు విరుచుకు పడ్డారు. సీమాంధ్రకు చెందిన తెలుగుదేశం పార్టీ అధ్యక్షుడు నారా చంద్రబాబు నాయుడు, కాంగ్రెసు శాసనసభ్యుడు శైలజానాథ్ తెలంగాణ విమోచన దినోత్సవాన్ని ప్రభుత్వం అధికారికంగా జరపాలని అంటున్నారు. సిపిఎం కూడా అందుకు మద్దతిస్తోంది. ముఖ్యమంత్రి కె. రోశయ్య మాత్రం అందుకు సిద్ధంగా ఉన్నట్లు లేరు. గత సంప్రదాయాలనే అనుసరిస్తామని, కొత్త సంప్రదాయాలను ముందుకు తేమని ఆయన సున్నితంగా ఆ డిమాండ్ ను తిరస్కరించారు. అయితే, ముఖ్యమంత్రిపై ఒత్తిడి పెరుగుతూనే ఉన్నది.

దేశమంతా ఆగస్టు 15వ తేదీన బ్రిటిష్ పాలకులను నుంచి స్వాతంత్ర్యం పొందగా హైదరాబాదు రాజ్యం మాత్రం నైజాం ఏలుబడిలోనే ఉంది. అది ఒక స్వతంత్ర దేశంగా భారతదేశం మధ్యలో ఉంది. దేశమంతా స్వాతంత్ర్యం సాధించిన తర్వాత కూడా హైదరాబాదు రాజ్యంలో నిజాం పాలనకు వ్యతిరేకంగా పోరాటం సాగుతూనే ఉన్నది. హైదరాబాదును స్వతంత్ర రాజ్యంగా ప్రకటింపజేసుకోవడానికి నిజాం ఐక్యరాజ్య సమితి దాకా వెళ్లారు. అయితే, అప్పటి కేంద్ర హోం మంత్రి సర్దార్ వల్లభ్ బాయ్ పటేల్ హైదరాబాదు రాజ్యం మీదికి యూనియన్ సైన్యాలను పంపారు. యూనియన్ సైన్యాలు నిజాం సైనికుల మీదనే కాకుండా సాయుధ పోరాటం సాగిస్తున్న కమ్యూనిస్టులపై కూడా యుద్ధం ప్రకటించాయి. దాదాపుగా యూనియన్ సైన్యాలు హైదరాబాద్ రాజ్యాన్ని తమ ఆధీనంలోకి తెచ్చుకున్న సమయంలో నిజాం సెప్టెంబర్ 17వ తేదీన భారత యూనియన్ కు లొంగిపోయారు. దాంతో భారతదేశంలో హైదరాబాద్ రాజ్యం విలీనమైంది. దాన్నే తెలంగాణ ప్రజల కోసం స్వాతంత్ర్య దినోత్సవంగా ప్రభుత్వం నిర్వహించాలని డిమాండ్ బలంగా వస్తోంది. ఈ డిమాండ్ చాలా కాలంగా ఉన్నప్పటికీ ఈసారి మరింత ఊపందుకుంది.

భారత యూనియన్ లో విలీనమైన తర్వాత హైదరాబాద్ రాజ్యం హైదరాబాద్ రాష్ట్రంగా కొనసాగింది. ఈ హైదరాబాద్ రాష్ట్రంలో కర్నాటకలోని బళ్లారి తదితర ప్రాంతాలు, మహారాష్ట్రలోని కొన్ని ప్రాంతాలు ఉన్నాయి. భాషా ప్రాతిపదికపై ఆంధ్రప్రదేశ్ రాష్ట్రం 1956లో ఏర్పడినప్పుడు హైదరాబాద్ రాష్ట్రంలోని కొన్ని ప్రాంతాలు ఆ రాష్టాలకు వెళ్లాయి. తెలంగాణ మాత్రం ఆంధ్రప్రదేశ్ లో కలిసింది. దీంతో తెలంగాణలో ఆగస్టు 15వ తేదీన్నే స్వాతంత్ర్య దినోత్సవం జరుగుతోంది. సెప్టెంబర్ 17 దాదాపుగా విస్మరణకు గురైంది. తెలంగాణ ప్రత్యేక రాష్ట్ర డిమాండ్ ఉద్యమం ముందుకు వచ్చిన తర్వాత ఆ తేదీన తెలంగాణ విమోచన దినోత్సవాన్ని ప్రభుత్వం జరపాలనే డిమాండ్ ముందుకు వచ్చింది. గత హైదరాబాద్ రాజ్యంలోని ప్రాంతాల్లో కర్నాటక, మహారాష్ట ప్రభుత్వాలు అదికారికంగా సెప్టెంబర్ 17వ తేదీన ప్రభుత్వాలు నిర్వహిస్తున్నాయి. ఆ రాష్ట్రాలు అధికారికంగా నిర్వహించినప్పుడు ఆంధ్రప్రదేశ్ ప్రభుత్వానికి వచ్చిన నష్టమేమిటనేది ప్రశ్న.