బాలయ్య ఎపిసోడ్, చిరంజీవి పదును

By Pratap

Published: Thursday, January 26, 2012, 10:15 [IST]

సరైన సలహాదారు దొరికాడా, తానే రాటు దేలారా తెలియదు గానీ చిరంజీవి రాజకీయాల్లో పదును కనిపిస్తోంది. తెలుగుదేశం పార్టీ నాయకుడు, సినీ హీరో బాలకృష్ణ ఎంతగా రెచ్చగొట్టే వ్యాఖ్యలు చేసినా చిరంజీవి రెచ్చిపోలేదు సరి కదా, చాలా నింపాదిగా వ్యవహరించారు. పైగా, బాలకృష్ణను తక్కువ చేయడానికి అవసరమైన ఎత్తుగడను కూడా ఎంచుకున్నారు. చిరంజీవి సామాజిక న్యాయం నినాదాన్ని బాలకృష్ణ ప్రశ్నించడంతో మొదలైన స్టార్ వార్ చిరంజీవి తన అభిమానుల గురించి మాట్లాడడంతో ముగిసినట్లు కనిపిస్తోంది. చిరంజీవిపై బాలకృష్ణ మాట్లాడడానికి ఆ తర్వాత నిరాకరించారు. వ్యవహారం తనకు వ్యతిరేకంగా మారుతుందనే ఉద్దేశంతోనే బాలకృష్ణ వెనక్కి తగ్గినట్లు కనిపిస్తున్నారు.

చిరంజీవి ఆరితేరిన రాజకీయ నాయకుడిలా వ్యవహరిస్తూ బాలకృష్ణవి చిన్నపిల్లాడి మాటలని, చిన్నపిల్లల మాటలు పట్టించుకోవాల్సిన అవసరం లేదని చిరంజీవి అన్నారు. ఆ తర్వాతి బాలకృష్ణ వ్యాఖ్యలకు కూడా ఆయన అనుభవం జోడించి మాట్లాడినట్లు కనిపిస్తున్నారు. చిరంజీవిపైనా పోటీ చేస్తానని బాలకృష్ణ సవాల్ చేశారు. దానికి కూడా చిరంజీవి పెద్దగా రెచ్చిపోలేదు. ప్రజాస్వామ్యంలో ఎవరు ఎవరి మీదనైనా పోటీ చేయవచ్చునని, బాలకృష్ణ వ్యాఖ్యల్లో తప్పు లేదని ఆయన చెప్పారు. అలాగే, అభిమానుల మధ్య ఘర్షణ వాతారవరణంపై కూడా చిరంజీవి హుందాగానే వ్యవహరించారు. ఘర్షణలకు దిగవద్దని తన అభిమానులకు చెప్తానని, అభిమానులు రెచ్చిపోకుండా చూసుకోవాల్సిన బాధ్యత తమపై ఉందని ఆయన అన్నారు.

బాలకృష్ణ, చిరంజీవి స్టార్ వార్‌లో చిరంజీవి పైచేయి సాధించారనే అభిప్రాయం వ్యక్తమవుతోంది. ప్రజారాజ్యం పార్టీ స్థాపన, ఆ తర్వాత కాంగ్రెసులో విలీనం, ఇప్పుడు కాంగ్రెసు నాయకుల సలహాలు చిరంజీవిని రాటు దేలించాయని అంటున్నారు. రాజకీయాల్లో ఎంత వరకు మాట్లాడాలో, ఎంత వరకు మాట్లాడకూడదో ఆయన నేర్చుకున్నట్లే ఉన్నారు. బాలకృష్ణకు కూడా అలా రాటు దేలడానికి ఎంతో కాలం పట్టదని అంటున్నారు. రాజకీయ వాతావరణాన్ని వేడెక్కించడానికి మాత్రమే బాలకృష్ణ అలా మాట్లాడారని, రాజకీయ పరిపక్వత లేకకాదని అంటున్నారు. ఏమైనా, బాలకృష్ణ, చిరంజీవి వారికి వారే సాటి.

Published On January 26, 2012