వైఎస్ కు అంత తీరిక లేదేమో?

ముఖ్యమంత్రి డాక్టర్ రాజశేఖరరెడ్డి వచ్చే ఎన్నికల్లో విజయంపై అతి విశ్వాసంతో ఉన్నారు. ఆయన అలా ఉండడమే మంచిదని, కార్యకర్తల్లో ఆత్మ విశ్వాసం పెరుగుతుందని మంత్రులు ప్రైవేటుగా వ్యాఖ్యానిస్తున్నారు. చిరంజీవి స్వగ్రామమైన మొగల్తూరులో వైఎస్ రాజశేఖరరెడ్డి పర్యటించవలసి ఉంది. వైఎస్ సొంత పట్టణం పులివెందులలో చిరంజీవి రోడ్ షోలు సూపర్ హిట్ అయిన విషయం తెలిసిందే.

మొగల్తూరులో వైఎస్ పర్యటించి చిరంజీవి గాలి తీస్తారన్న అభిప్రాయాన్ని అధికార పార్టీ నాయకులు కలుగజేశారు. కానీ జాతీయ రాజకీయాలు, శాంతిభద్రతల పరిస్ధితుల నేపధ్యంలో వైఎస్ మొగల్తూరు పర్యటన సాధ్యం కాకపోవచ్చని తెలుస్తోంది. పశ్చిమ గోదావరి జిల్లా ఆకివీడులో ప్రజారాజ్యం పార్టీ సీనియర్ నాయకుడు హరిరామజోగయ్య ఒక సవాలు విసిరారు. మొగల్తూరులో వైఎస్ వస్తే జనం నుంచి ఆదరణ ఉంటుందా అన్నది ఆయన సవాలు. ఆ సవాలును వైఎస్ స్వీకరించినట్టు కన్పించినా ఇప్పుడు ఆ పని జరిగేటట్టు కన్పించడం లేదు.