డిఎస్ తోక కత్తిరింపు

నిజామాబాద్ నియోజకవర్గం నుంచి పోటీ చేస్తున్న ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ తోకను పార్టీ అధిష్టానం కత్తిరించినట్లే ఉంది. శుక్రవారం సాయంత్రం ముఖ్యమంత్రి కె. రోశయ్య మాట్లాడిన తీరు ఈ విషయాన్ని పట్టిస్తోంది. తెలంగాణ రాష్ట్ర సాధనకు కర్త, కర్మ, క్రియ తానే అని ప్రచారం చేసుకుని ఎన్నికల్లో గెలవడానికి ప్రయత్నించిన డి. శ్రీనివాస్ ఎత్తుగడకు బ్రేకులు పడినట్లు తెలుస్తోంది. తనను గెలిపిస్తే ముఖ్యమంత్రిని అవుతానని చెప్పిన మాటలను కూడా రోశయ్య హేళన చేస్తూ మాట్లాడారు. దీన్ని బట్టి డిఎస్ పై రోశయ్య ఆధిక్యత సాధించినట్లేనని భావించవచ్చు.

అభివృద్ధి, సంక్షేమమే ఉప ఎన్నికల్లో తమ ఎజెండా అని రోశయ్య చెప్పారు. తెలంగాణ నినాదాన్ని ప్రధాన ఎజెండాగా చేసుకుని విజయం సాధించాలని డిఎస్ చేసిన ప్రయత్నానికి ఈ రకంగా కళ్లెం పడినట్లేనని చెప్పవచ్చు. డిఎస్ వల్ల తన పదవికి ప్రమాదం లేదని కూడా ఆయన చాలా తేలికగా మాట్లాడారు. 2014 నాటికి తెలంగాణ రాష్ట్రం ఏర్పడుతుందని, తానే తెలంగాణ సాధిస్తానని, తానే తొట్టతొలి తెలంగాణవాదిని అని డిఎస్ ప్రగల్భాలు పలుకుతూ వచ్చారు. ఆ ప్రగల్భాలకు ఇక తావు లేని నిర్ణయాన్ని పార్టీ హైకమాడ్ తీసుకున్నట్లు రోశయ్య మాటలను బట్టి అర్థం చేసుకోవచ్చు.