బాబుతో తెలంగాణ నేతల తెగదెంపులు?

By Pratap

Published: Monday, August 8, 2011, 9:30 [IST]

తమ పార్టీ అధ్యక్షుడు నారా చంద్రబాబు నాయుడితో తెలుగుదేశం తెలంగాణ నేతలు తెగదెంపులు చేసుకుంటారా అనే ప్రశ్న ఉదయిస్తోంది. తెలంగాణ విషయంలో చంద్రబాబు అనుసరిస్తున్న వైఖరి తెలంగాణ నేతలకు కక్కలేని మింగలేని పరిస్థితిని కల్పించిందని అంటున్నారు. తెలంగాణపై లోకసభలో జరిగిన చర్చకు సమాధానమిస్తూ - కేంద్ర హోం మంత్రి పి. చిదంబరం చంద్రబాబుపై తీవ్ర వ్యాఖ్యలు చేశారు. ఆ వ్యాఖ్యలకు చంద్రబాబు ప్రతిస్పందిస్తారని తెలుగుదేశం తెలంగాణ నేతలు భావించారట. కానీ చంద్రబాబు నోరు విప్పకపోవడం వారిని ఆగ్రహానికి గురి చేసినట్లు చెబుతున్నారు.

చిదంబరం వ్యాఖ్యలకు పార్టీ అధ్యక్షుడిగా చంద్రబాబు వివరణ ఇచ్చి ఉంటే తమకు తెలంగాణలో మరింత బలం చేకూరి ఉండేదని, చంద్రబాబు మౌనం వల్ల ప్రజల్లో విశ్వాసం పెరగడం లేదని వారు అనుకుంటున్నారని అంటున్నారు. అవసరమైతే చంద్రబాబుతో తెగదెంపులు చేసుకునే దాకా వెళ్లడానికి వారు సంసిద్ధమైనట్లు చెబుతున్నారు. బాపూజీ చెప్తే తాము పార్టీలను వీడడానికి సిద్ధంగా ఉన్నామని ఆదివారం పార్టీ తెలంగాణ ఫోరం కన్వీనర్ ఎర్రబెల్లి దయాకర్ రావు మాటలు అందుకు సూచికగా భావిస్తున్నారు.

Published On August 8, 2011