శోభానాగిరెడ్డిపై జగన్ క్యాంప్ గుర్రు?

By Pratap

Published: Saturday, August 27, 2011, 9:45 [IST]

తామొకటి తలిస్తే కాంగ్రెసు నాయకత్వం మరోటి తలిచిందని వైయస్సార్ కాంగ్రెసు పార్టీ అధ్యక్షుడు వైయస్ జగన్ వర్గానికి చెందిన శానససభ్యులు తలలు పట్టుకుంటున్నారట. అందుకు వైయస్ జగన్ బంధువు శోభా నాగిరెడ్డి కారణమని వారు గుర్రుమంటున్నట్లు వార్తలు వస్తున్నాయి. రాజీనామాలు చేస్తే కాంగ్రెసు నాయకత్వం వణికిపోతుందని చెప్పి రాజీనామాలకు శోభా నాగిరెడ్డి అందరినీ సమాయత్తం చేసినట్లు చెబుతున్నారు. తీరా, పరిస్థితి అందుకు భిన్నంగా ఉంది.

వైయస్సార్ పేరును సిబిఐ ఎఫ్ఐఆర్‌లో చేర్చినందుకు నిరసన అంటూ సెంటిమెంటును రెచ్చగొడితే కాంగ్రెసు కంగు తింటుందని ఆమె వారికి నూరిపోశారట. ముఖ్యమంత్రి కిరణ్ కుమార్ రెడ్డి గానీ పిసిసి అధ్యక్షుడు బొత్స సత్యనారాయణ గానీ ఏ మాత్రం దిగి రాకుండా వారిని వెళ్లగొట్టేందుకే సిద్ధపడ్డారని అంటున్నారు. దీంతో రాజీనామాలు చేసిన జగన్ వర్గానికి చెందిన కొంత మంది శాసనసభ్యులు శోభానాగిరెడ్డిపై మండిపడుతున్నట్లు చెబుతున్నారు.

Published On August 27, 2011