ఆజాద్‌పై దామోదర రాజనర్సింహ అలక?

ఉప ముఖ్యమంత్రి దామోదర రాజనర్సింహ కాంగ్రెసు ఆంధ్రప్రదేశ్ వ్యవహారాల ఇంచార్జీ గులాం నబీ ఆజాద్‌పై అలక వహించినట్లు చెబుతున్నారు. ఆజాద్ తీరుపై ఆయన గుర్రుగా ఉన్నారట. తనకు హోం శాఖను కేటాయించే విషయంపై ఆజాద్‌లో కదలిక కనిపించకపోవడమే అందుకు కారణమని అంటున్నారు. ఉప ముఖ్యమంత్రికి హోం శాఖను కేటాయించడం సర్వసాధారణంగా ఉంటూ వస్తోంది. అయితే దామోదర రాజనర్సింహను ఉప ముఖ్యమంత్రిగా నియమించినప్పటికీ హోం శాఖ మాత్రం సబితా ఇంద్రా రెడ్డి వద్దనే ఉంది. హోం శాఖపై కన్నేసిన దామోదర రాజనర్సింహ తన వర్గంవారితో కలిసి ముఖ్యమంత్రి కిరణ్ కుమార్ రెడ్డిపై ఒత్తిడి పెంచారని అంటున్నారు.

దామోదర రాజనర్సింహకు హోం శాఖ దక్కేలా చూడడానికే మాజీ పి. శంకరరావు మాదిగ రిజర్వేషన్ పోరాట సమితి (ఎమ్మార్పీయస్) నేత మంద కృష్ణ మాదిగ, ఇతర కుల సంఘాల నాయకులతో కలిసి సబితా ఇంద్రారెడ్డిపై పోరాటం సాగించారనే అభిప్రాయం బలంగానే ఉంది. ఆ వ్యూహం ఫలించకపోగా శంకరరావు మంత్రి వర్గానికి దూరమయ్యారు. దీంతో దామోదర రాజనర్సింహపై తీవ్రమైన ఒత్తిడి పెరుగుతున్నట్లు తెలుస్తోంది. దీంతో ఆయన ముఖ్యమంత్రిపైనే కాకుండా ఆజాద్‌పై కూడా గుర్రమంటున్నట్లు సమాచారం.

English summary

It is said that Deputy CM Damodara Rajanarsimha is unhappy with AP Congress affairs incharge Ghulam Nabi Azad.