వైయస్ జగన్ పార్టీ వైపు జీవన్ రెడ్డి?

తెలంగాణలోని ఓ బలమైన నేత వైయస్ జగన్ నాయకత్వంలోని వైయస్సార్ కాంగ్రెసు వైపు చూస్తున్నట్లు అనిపిస్తోంది. మాజీ మంత్రి, కరీంనగర్ జిల్లా కాంగ్రెసు నాయకుడు టి. జీవన్ రెడ్డి వైయస్సార్ కాంగ్రెసులో చేరనున్నట్లు పుకార్లు షికార్లు చేస్తున్నాయి. ఆయన గురువారం చేసిన ప్రకటన ఇందుకు వైయస్సార్ కాంగ్రెసు పార్టీ వైపు చూస్తున్నారని చెప్పడానికి తాజా నిదర్శనమని అంటున్నారు. కాంగ్రెసు పార్టీలో ఉంటూనే ఆయన వైయస్ జగన్ జపం చేస్తున్నారు.

సీమాంధ్ర ప్రాంతంలో జరిగే ఉప ఎన్నికల్లో వైయస్ జగన్ ప్రభంజనాన్ని ఏ శక్తీ ఆపలేదని ఆయన అన్నారు. గత్యంతరం లేని స్థితిలోనే వైయస్ జగన్ వర్గం శాసనసభ్యులపై అనర్హత వేటు వేశారని ఆయన అన్నారు. ఉప ఎన్నికల్లో ఓటమి పాలనవుతామని ముఖ్యమంత్రి కిరణ్ కుమార్ రెడ్డి ముందే ఓ అవగాహనకు వచ్చినట్లు కనిపిస్తోందని జీవన్ రెడ్డి అన్నారు. ప్రత్యేక రాష్ట్రం ఏర్పాటుకు ప్రకటన చేస్తేనే తెలంగాణలో కాంగ్రెసుకు భవిష్యత్తు ఉంటుందని ఆయన అన్నారు. జీవన్ రెడ్డి చేరితే వైయస్సార్ కాంగ్రెసుకు కరీంనగర్‌ జిల్లాలో పెద్ద బలమే.