కావూరిలో మార్పు: 'టీ'పై లగడపాటి ఏం చెప్తారో?

హైదరాబాద్: తెలంగాణ అంశం ఎప్పుడు తెర మీదికి వచ్చినా మీడియా సమావేశం పెట్టి సుదీర్ఘంగా ప్రసంగం చేసే కాంగ్రెసు విజయవాడ పార్లమెంటు సభ్యుడు లగడపాటి రాజగోపాల్ ఈసారి ఏం చెప్తారనేది ఆసక్తికరంగా మారింది. నిజానికి, ఆయన మౌనం వహించినట్లు ఈ మధ్య వార్తలు వచ్చాయి. దాంతో ఆయన తన గొంతు విప్పాలని అనుకుంటున్నారు. ఈ నెల 2వ తేదీనాడు తాను మాట్లాడుతానని చెప్పారు.

కేంద్రంలో మంత్రి పదవి రాగానే సమైక్య గళానికి నాయకత్వం వహిస్తూ వచ్చిన కావూరి సాంబశివ రావు రాజీ మార్గానికి వచ్చారు. లగడపాటి రాజగోపాల్ కూడా అదే విధమైన రాజీ మార్గానికి ఏమైనా వచ్చారా అనుమానాలు వ్యక్తమవుతున్న తరుణంలో తాను గొంతు విప్పుతానని ఆ అనుమానాలకు తెర దించారు.

ప్రతి సందర్భంలోనూ లగడపాటి రాజగోపాల్ తారీఖులు, దస్తావేజులతో ముందుకు వచ్చి మీడియా సమావేశాలు పెడుతూ వస్తున్నారు. తెలంగాణ రాష్ట్ర ఏర్పాటు సాధ్యం కాదని ఆయన గట్టిగా చెబుతూ వచ్చారు. అదే నమ్మకంతో ఆయన ఇప్పుడు కూడా ఉన్నారా, తెలంగాణపై కాంగ్రెసు అధిష్టానం చేస్తున్న కసరత్తును గమనిస్తున్నారా అనేది తెలియదు.

తెలంగాణవాదం తగ్గుముఖం పట్టిందని, తెలంగాణ వివాదం సమసిపోయిందని ఆయన ఆ మధ్య ఓసారి అన్నారు. రేపు మంగళవారం ఆయన తెలంగాణపై ఏం మాట్లాడుతారనేది ఆసక్తికరంగానే ఉంది. కావూరి సాంబశివ రావు తన వైఖరి మార్చుకోవడం కారణంగానే లగడపాటి చెప్పే విషయాలపై ఆసక్తి నెలకొని ఉంది.

English summary

Curiosity is developped about the opinion of Congress Seemandhra MP Lagadapati Rajagopal on Tela ngana issue, in the wake of change in Kavuri Sambasiva Rao's stand.