సమ్మర్ స్పెషల్ 'తాటి ముంజలు కూర'.. ఎలా చేయాలంటే ??

వేసవి కాలం రాగానే మనకు గుర్తుకు వచ్చే ప్రకృతి వరప్రసాదం 'తాటి ముంజలు'. భానుడి భగభగలకు శరీరం త్వరగా అలసిపోతుంది. ఇలాంటి సమయంలో శరీర ఉష్ణోగ్రతను నియంత్రించి, లోపల నుండి చల్లబరచడంలో తాటి ముంజలు ప్రధాన పాత్ర పోషిస్తాయి. ఇందులో నీటి శాతం చాలా ఎక్కువగా ఉండటం వల్ల శరీరానికి కావాల్సిన తేమను అందించి, డీహైడ్రేషన్ (నిర్జలీకరణం) బారిన పడకుండా కాపాడుతాయి. కృత్రిమ కూల్ డ్రింక్స్ కంటే ఇవి వేల రెట్లు మేలైనవి.

వీటిని 'ఐస్ ఆపిల్' (Ice Apple) అని కూడా పిలుస్తారు. రుచికి తియ్యగా, చల్లగా ఉండే తాటి ముంజలు కేవలం దాహాన్ని తీర్చడమే కాకుండా ఆరోగ్యానికి ఎంతో మేలు చేస్తాయి. అయితే వీటితో కూర కూడా చేయొచ్చు. ఈ కర్రీ రుచికరంగానే కాకుండా శరీరానికి చల్లదనం అందిస్తుంది. మెత్తగా ఉండే ముంజలు, మసాలా గ్రేవీ కలిసిన ఈ కూరను వేడి వేడి అన్నం, నెయ్యి, చపాతీ లేదా జొన్న రొట్టెలతో సర్వ్ చేస్తే రుచిగా ఉంటుంది. ఆ టేస్టీ రెసిపీ మీకోసం ప్రత్యేకంగా..

అవసరమైన పదార్థాలు..

• తాటి ముంజలు - 6 నుంచి 8 (తొక్క తీసి ముక్కలు చేయాలి)
• ఉల్లిపాయలు - 2 (సన్నగా తరిగినవి)
• టమాటాలు - 2 (ముక్కలు చేసినవి)
• పచ్చిమిర్చి - 2 నుంచి 3
• అల్లం వెల్లుల్లి పేస్ట్ - 1 టీస్పూన్
• పసుపు - ¼ టీస్పూన్
• కారం - 1 టీస్పూన్ (రుచికి తగ్గట్టు)
• ఉప్పు - తగినంత
• నూనె - 2 టేబుల్ స్పూన్లు
• ఆవాలు - ½ టీస్పూన్
• జీలకర్ర - ½ టీస్పూన్
• కొత్తిమీర - కొద్దిగా
• పల్లీలు - 2 టేబుల్ స్పూన్లు
• గసాలు (poppy seeds) - 1 టీస్పూన్
• తాజా కొబ్బరి తురుము - 3 టేబుల్ స్పూన్లు
• చిన్న ఉల్లిపాయ - 1

తయారీ విధానం..

ముందుగా తాటి ముంజల పై తొక్క తీసి, చిన్న ముక్కలుగా కోసుకోవాలి. చాలా మెత్తగా ఉన్నవి కాకుండా కొద్దిగా గట్టిగా ఉన్న ముంజలు తీసుకుంటే కూర బాగా వస్తుంది.

పల్లీలు, గసాలు, కొబ్బరి, చిన్న ఉల్లిపాయను మిక్సీలో వేసి కొద్దిగా నీరు జత చేసి మెత్తగా పేస్ట్ చేసుకోవాలి.

కడాయిలో నూనె వేడి చేసి ఆవాలు, జీలకర్ర వేయాలి. అవి చిటపటలాడిన తర్వాత పచ్చిమిర్చి, ఉల్లిపాయ ముక్కలు వేసి బంగారు రంగు వచ్చే వరకు వేయించాలి.

వెంటనే అల్లం వెల్లుల్లి పేస్ట్ వేసి మసాలా వాసన పోయే వరకు వేయించాలి.

ఇప్పుడు టమాటా ముక్కలు వేసి మెత్తగా అయ్యే వరకు ఉడికించాలి. తరువాత పసుపు, కారం, ఉప్పు వేసి కలపాలి.

ఆ తర్వాత కట్ చేసిన ముంజల ముక్కలు వేసి బాగా కలిపి, కొద్దిగా నీళ్లు పోసి మూత పెట్టి ఉడికించాలి.

ముంజలు కొద్దిగా మెత్తబడిన తర్వాత గ్రైండ్ చేసిన పల్లీ-కొబ్బరి మసాలా పేస్ట్ వేసి బాగా కలపాలి. తక్కువ మంటపై కూర చిక్కగా అయ్యే వరకు ఉడికించాలి.

కూర దగ్గరపడి నూనె పైకి తేలిన తర్వాత కొత్తిమీర చల్లి స్టవ్ ఆఫ్ చేయాలి.

ముఖ్యమైన చిట్కాలు..

• ముంజలు మరీ లేతగా ఉంటే కూరలో కరిగిపోతాయి, కాస్త గట్టిగా ఉన్నవి వాడాలి.
• కూరకు క్రీమీ టెక్స్చర్ రావాలంటే పల్లీ-కొబ్బరి పేస్ట్ తప్పనిసరి.
• చివర్లో కొద్దిగా కసూరీ మెంతి వేస్తే మంచి సువాసన వస్తుంది.
• కారం తగ్గించి, మిరియాల పొడి కొంచెం వేస్తే కొత్త ఫ్లేవర్ వస్తుంది.
• కూర ఎక్కువసేపు ఉడికిస్తే రుచి ఇంకా బాగా మెలుగుతుంది.

English summary

The natural gift that comes to mind when summer arrives is 'palm leaves'. The body gets tired quickly due to the heat of the sun. During such times, palm leaves play a major role in regulating the body temperature and cooling it from within.