11 మందిని బలి గొన్న ఉగ్రవాదులు

శ్రీనగర్‌: జమ్మూ కాశ్మీర్‌లోని ఫూంచ్‌ జిల్లాలో గల ఒక గ్రామంలో ఉగ్రవాదులు మూడు ముస్లిం కుటుంబాలపై 11 మందిని దారుణంగా కాల్చి వేశారు. ఈ కాల్పుల్లో మరణించినవారిలో ఎనమండుగురు పిల్లలు, ఒక మహిళ వున్నారు. ఈ సంఘటనలో ఇద్దరు తీవ్రంగా గాయపడ్డారు. ఈ సంఘటన ఆదివారం రాత్రి సంభవించినట్లు పోలీసులు సోమవారం తెలియజేశారు.

విదేశీ ఉగ్రవాదులు ఈ దారుణానికి పాల్పడినట్లు అనుమానిస్తున్నారు. ఉగ్రవాదుల గుంపు సాల్వా- బెరాహ్‌ గ్రామంలోకి ఆదివారం అర్థరాత్రి ప్రవేశించి జకీర్‌ హుస్సేన్‌ను, రెండేళ్ల వయస్సు కూడా దాటని ఆయన కొడుకును, కూతురును కాల్చి చంపారు. ఆ తర్వాత జమ్మూ కాశ్మీర్‌ లైట్‌ ఇన్‌పాంట్రీ జవాను మొహమ్మద్‌ జామన్‌ ఇంటిపై దాడి చేసి ఆయన భార్య ఖాతిమా బీ (35), నలుగురు పిల్లలను కాల్చి చంపారు.అనంతరం మొహమ్మద్‌ అక్రమ్‌ ఇంటిపై దాడి చేసి ఆయన మూడేళ్ల కూతురు రుబినాను, ఆరు నెలల కొడుకు ఇస్లాక్‌ను హత్య చేశారు.

దీనికి తోడు, ఉత్తర ప్రదేశ్‌కు చెందిన మక్సూద్‌ అహ్మద్‌ను హత్య చేశారు. గ్రామంలోనిస్పెషల్‌ పోలీసు ఆఫీసర్‌ మొహమ్మద్‌ నజీర్‌ను కిడ్నాప్‌ చేశారు. జైష్‌- ఎ- మొహమ్మద్‌ గానీ, లష్కర్‌- ఎ- తోయిబా గానీ ఈ దారుణానికి పాల్పడి వుండవచ్చునని ఇంటలిజెన్స్‌ అధికారులు అనుమానిస్తున్నారు.