జనసముద్రంగా మారిన కోనసీమ

అమలాపురంః దివంగత నేత లోక్‌సభ స్పీకర్‌ జిఎంసి బాలయోగి అంత్యక్రియల్లో పాల్గొనేందుకు, కడసారిగా ఆయన్ను దర్శించుకునేందుకు దేశం నలుమూలలనుంచి ప్రముఖులు అమలాపురం చేరుకుంటున్నారు. ప్రముఖుల ఆగమనంతోనూ కోస్తాంధ్రలోని వివిధ జిల్లాలనుంచి పెద్ద సంఖ్యలో వస్తున్న ప్రజలు, అభిమానులతోనూ గోదావరి రెండుపాయల మధ్య వున్న కోనసీమ జనసంద్రంగా మారింది. ప్రధాని వాజ్‌పేయి, ప్రతిపక్ష నేత సోనియాగాంధీ, కేంద్ర మంత్రి వెంకయ్యనాయుడు, లోక్‌సభ సెక్రటరీ జనరల్‌ మల్హోత్ర, లోక్‌సభ డిప్యూటీ స్పీకర్‌ సయీద్‌, రాజ్యసభ ఉపసభాపతి నజ్మాహెఫ్తుల్లా ప్రత్యేక విమానంలో బుధవారం ఉదయం విశాఖపట్నం చేరుకున్నారు.

అక్కడి నుంచి హెలికాప్టర్‌లో ప్రధాని, సోనియా అమలాపురం బయలుదేరుతున్నారు. రాష్ట్ర మంత్రులు మంగళవారం రాత్రికే అమలాపురానికి చేరుకోగా, ముఖ్యమంత్రి చంద్రబాబు నాయుడు బుధవారం ఉదయం హెలికాప్టర్‌లో అమలాపురం చేరుకున్నారు. రాష్ట్ర కాంగ్రెస్‌సీనియర్‌ నేతలంతా అంత్యక్రియలకు హాజరవుతున్నారు. కర్ణాటక ముఖ్యమంత్రి ఎస్‌ఎం కృష్ణ, పాండిచ్చేరి ముఖ్యమంత్రి తో పాటు పలు పాష్ట్రాల అధికార ప్రతినిధులు అంత్యక్రియల్లో పాల్గొనేందుకు అమలాపురం చేరుకున్నారు. మంగళవారం నాడు ప్రజల సందర్శనార్ధం ఎస్‌కెబిఆర్‌ కాలేజి ఆవరణలో వుంచిన బాలయోగి భౌతిక కాయాన్ని నాలుగు కిలోమీటర్ల దూరంలోని బాలయోగి ఘాట్‌కు ఊరేగింపుగా తీసుకువెళ్లుతున్నారు. మధ్యాహ్నం పన్నెండు గంటల ప్రాంతంలో భౌతిక కాయాన్ని చితిపైకి చేరుస్తారు. ఈ సమయానికల్లావివిఐపిలంతా అంత్యక్రియలు జరుగుతున్న ప్రాంతానికి చేరుకుంటారు. పూర్తి స్థాయి అధికార లాంఛనాలతో అంత్యక్రియలను నిర్వహిస్తున్నారు.