రాజ్యసభకు మళ్ళీ శత్రుఘన్‌ సిన్హా

న్యూఢిల్లీః ప్రముఖ హిందీ నటుడు శత్రుఘన్‌ సిన్హా, బిజెపి అధ్యక్షుడు జానా కృష్ణమూర్తిని రాజ్యసభకు బిజెపి ఎంపిక చేసింది. సిన్హాను బీహార్‌ నుంచి, జానాను గుజరాత్‌ నుంచి రాజ్యసభకు ఎంపిక చేస్తున్నట్లు బిజెపి శనివారం ప్రకటించింది. కొద్దిరోజులుగా బిజెపి అధిష్ఠానంతో ఎడమొఖం పెడముఖంగా వున్న శత్రుఘన్‌ సిన్హాను కూడా రాజ్యసభకు ఎంపికచేయడం విశేషం. కాస్త జనాకర్షణ వున్న నేతలు లేక ఒట్టిపోయిన పార్టీకి శత్రుఘన్‌ ను కూడా దూరం చేసుకుంటే కష్టాలు తప్పవనే ఉద్దేశంగా ఆయనను తిరిగి రాజ్యసభకు ఎంపిక చేశారని భావిస్తున్నారు.

పార్టీ అధ్యక్షుడు జానా కృష్ణమూర్తిని గుజరాత్‌ నుంచి రాజ్యసభకు ఎంపిక చేశారు 1998 లోక్‌ సభ ఎన్నికల్లో దక్షణ మద్రాస్‌ నుంచి పోటీ చేసి ఓడిపోయిన జానాను మాజీ బిజెపి అధ్యక్షుడు బంగారు లక్ష్మణ్‌ స్థానంలో రాజ్యసభకు ఎంపిక చేశారు. తెహల్కా కుంభకోణం పుణ్యమా అని పార్టీ అధ్యక్ష పదవిని కోల్పోయిన బంగారు లక్ష్మణ్‌ ఇప్పుడు రాజ్యసభసీటు కూడా కోల్పోయే పరిస్థితి ఏర్పడింది.