అయోధ్యపై అసెంబ్లీలో రభస-వాకౌట్‌

హైదరాబాద్‌ః అయోధ్యఅంశాన్ని అసెంబ్లీలో చర్చించాల్సిందిగా కోరుతూ కాంగ్రెస్‌, మజ్లిస్‌ పార్టీలు బుధవారం ఆసెంబ్లీలో రభస సృష్టించాయి. సుమారు గంటసేపు సభా కార్యక్రమాలను స్తంభింపచేశాయి. అయోధ్యపై చర్చజరగాలంటూ ఎం.ఐ.ఎ. ఇచ్చిన వాయిదా తీర్మానాన్ని స్పీకర్‌ తిరస్కరించారు. దీంతో కాంగ్రెస్‌ కూడా ఎం.ఐ.ఎ.తో గొంతు కలిపింది.

అయోధ్యలో బాబ్రీమసీదును పునర్నిర్మించాల్సిందిగాఎ.ఐ.ఎం. సభాపక్ష నాయకుడు అసదుద్దీన్‌ ఒవైసీ డిమాండ్‌ చేశారు. ఈ లోగాఎం.ఐ.ఎం. ఎమ్మెల్ల్యేలు ప్లేకార్డులు ప్రదర్శిస్తూ వెల్‌ లోకివచ్చారు. మధ్యలో తెలుగుదేశం సభ్యుడు దివి శివరాం, బిజెపి నేత ఇంద్రసేనారెడ్డి మజ్లిస్‌ను మరింత రెచ్చగొట్టే విధంగా వ్యాఖ్యలు చేశారు. ఒక దశలో హోం మంత్రి, ఇంద్రసేనారెడ్డిపై తీవ్ర ఆగ్రహం వ్యక్తం చేశారు కూడా.శాంతి భద్రతల పరిరక్షణకు అన్ని చర్యలు తీసుకుంటున్నామని హోం మంత్రి దేవేందర్‌ గౌడ్‌ హామీ ఇచ్చారు. అయోధ్య పరిణామాల దృష్ట్యా కట్టుదిట్టమైన భద్రతా చర్యలు మాత్రమే తీసుకుంటున్నామని చెప్పారు. దేవేందర్‌ గౌడ్‌ సమాధానంతో సంతృప్తి చెందని కాంగ్రెస్‌, ఎం.ఐ.ఎం సభ్యులు ఆగ్రహంతో సభ నుంచి వాకౌట్‌ చేశారు.