పూజ చేయం.... రాళ్ళు తరలిస్తాం

అయోధ్యః మార్చి 15న ఆలయ నిర్మాణం కోసం చెక్కిన రాళ్ళను నిర్మాణ స్థలానికి తరలిస్తామని రామజన్మభూమి న్యాస్‌ అధ్యక్షుడు రామచంద్రదాస్‌ పరమహంస స్పష్టం చేశారు. పూజ కానీ, శిలాన్యాసం కానీ నిర్వహించరాదని మాత్రమే సుప్రీంకోర్టు చెప్పిందని నిర్మాణానికి ఉద్దేశించిన రాళ్ళను అక్కడికి తరలించ వద్దనలేదని ఆయన బుధవారం అయోధ్యలో అన్నారు. సుప్రీంకోర్టు తీర్పు వెలువడిన వెంటనే పరమహంసవిలేకరులతో మాట్లాడుతూ మార్చి 15న ఆలయం కోసం చెక్కిన రాళ్ళతో అధికారులు అనుమతించినంత దూరం వెళతామని స్పష్టం చేశారు. కేవలం రాళ్ళు తరలిస్తామని భూమి పూజ కానీ, శిలాన్యాస్‌ కానీ చేయమని ఆయన చెప్పారు.

అధికారులు ఎక్కడ అడ్డుకుంటే అక్కడ ఆగిపోతామని, ప్రభుత్వంతో ఘర్షణకు దిగేది లేదని ఆయన చెప్పారు. ఉద్యమం చేపట్టాలనేది మా ఉద్దేశ్యం కాదని అయన చెప్పారు. ఆరునూరైనా భూమి పూజ చేస్తామని నిన్నటి వరకు ప్రకటించిన పరమహంస కోర్టు తీర్పు, దేశవ్యాప్తంగా పెరుగుతున్న ఉద్రిక్తతల కారణంగా అభిప్రాయాన్ని కొంత మార్చుకొని వుంటారని భావిస్తున్నారు.