పత్తి కొనుగోళ్ల నిలిపివేతపై దుమారం

హైదరాబాద్‌: పత్తి కొనుగోలును కాటన్‌ కార్పోరేషన్‌ ఆఫ్‌ ఇండియా (సిసిఐ) ఆపేయడంపై వెంటనే చర్చ చేపట్టాలని కాంగ్రెస్‌ శనివారం శాసనసభలో పట్టుబట్టింది. ఈ మేరకు కాంగ్రెస్‌ ఒక వాయిదా తీర్మానం ప్రతిపాదించింది. ఈ తీర్మానాన్ని స్పీకర్‌ కె. ప్రతిభా భారతి త్రోసి పుచ్చడంతో కాంగ్రెస్‌ సభ్యులు తమ పట్టు వీడకపోవడంతో కొద్ది సేపు సభా కార్యక్రమాలు స్తంభించాయి.

సిసిఐ పత్తి కొనుగోలును నిలిపేయడంపై కరీంనగర్‌ జిల్లా రైతులు శుక్రవారం ధర్నాకు, రాస్తారోకోకు దిగారు. ఈవిషయాన్ని కాంగ్రెస్‌ సభ్యులు ప్రస్తావిస్తూ దీనిపై వెంటనే చర్చ జరగాలని పట్టుబట్టారు. ఈవిషయంపై చర్చను ఎప్పుడు చేపడుతారో చెప్పాలని వారు డిమాండ్‌ చేశారు. సభా కార్యక్రమాలు స్తంభించడంపై శాసనసభా వ్యవహారాలమంత్రి ఆగ్రహం వ్యక్తం చేశారు. ఈ అంశంపై సోమవారం చర్చకు అనుమతి ఇవ్వనున్నట్లు ప్రతిభా భారతి ప్రకటించడంతో సభ సద్దు మణిగింది.