వార్‌ మందుపాతర: డిఎస్‌పికి గాయాలు

శ్రీకాకుళం: శ్రీకాకుళం జిల్లా భామిని మండలం ఘనసర వద్ద కొత్తూరు- బత్తిలి ప్రధాన రహదారిపై శుక్రవారం ఉదయం పీపుల్స్‌వార్‌ నక్సల్స్‌ పేల్చిన మందుపాతరలో పాలకొండ డిఎస్‌పి ప్రసాదరావుతో పాటు ఇద్దరు కానిస్టేబుళ్లు గాయపడ్డారు. కాల్పుల విరమణను రద్దు చేసుకున్న తర్వాత పీపుల్స్‌వార్‌ మందుపాతర పేల్చడం ఇదే ప్రథమం.ఈ సంఘటన శుక్రవారం ఉదయం గం.11. 20 నిమిషాల ప్రాంతంలో జరిగింది.

బుధవారం రాత్రి భామిని ఎమ్మార్వో కార్యాలయాన్ని నక్సల్స్‌పేల్చివేశారు. దీన్ని స్వయంగా పరిశీలించేందుకు డిఐజి ఎస్‌. ప్రభాకర రెడ్డి, ఎస్‌పి సునీల్‌ కుమార్‌ వస్తున్నారు.వీరి రాకకు ముందుగా అక్కడ వుండేందుక డిఎస్‌పి ప్రసాదరావు బయలుదేరారు. ఈ సందర్భంలో మందుపాతరపేలింది. ఈ పేలుడుకు డిఎస్‌పి ప్రయాణిస్తున్న జీపు నాలుగు అడుగులకుపైగా గాలిలోకి లేచి పడింది. దీంతో డిఎస్‌పి ఎడమ చేతికి తీవ్రంగా గాయాలయ్యాయి. జీపులో ఉన్న ఇద్దరు కానిస్టేబుళ్లకు, డ్రైవర్‌ ఉమామహేశ్వరరావుకుస్వల్పంగా గాయాలయ్యాయి. మందుపాతర పేలిన తర్వాత పోలీసులకు, నక్సల్స్‌కు మధ్య కొద్దిసేపు ఎదురుకాల్పులు జరిగాయి. సమాచారం అందుకునిస్పెషల్‌ పార్టీ పోలీసులు రావడంతో నక్సల్స్‌ అక్కడి నుంచి పరారయ్యారు.