కాసు పార్కుతో హైటెక్‌ సిటీకి కొత్తకళ

హైదరాబాద్‌ః బంజారా హిల్స్‌ లోని ప్రతిష్ఠాత్మకమైన కాసు బ్రహ్మానందరెడ్డి పార్కును సర్వాంగసుందరంగా అభివృద్ధి చేశామని రాష్ట్ర రోడ్లు భవనాల శాఖ మంత్రి తుమ్మల నాగేశ్వరరావు చెప్పారు. ఈ పార్కును 11 కోట్ల రూపాయలతో అభివృద్ధి చేసినట్లు ఆయన వివరించారు. పార్కు చుట్టూ 4,6 లైన్లు రోడ్లు పూర్తి కావచ్చాయని, హుడా పనులు కూడా మరో నెలరోజుల్లో పూర్తవుతాయని ఆయన సోమవారం ఆర్‌ అండ్‌ బి పనులు తనిఖీ చేసిన సందర్భంగా విలేకరులతో మాట్లాడుతూ చెప్పారు.

హైటెక్‌ సిటీ దారిలో బంజారా హిల్స్‌ తెలుగుదేశం పార్టీ ప్రధాన కార్యాలయం ఎదురుగా వున్న ఈ పార్కు ఇప్పుడు కొత్త శోభను సంతరించుకుంది. పార్కు చుట్టూ నాలుగు లైన్ల రోడ్లు నిర్మించడంతో పాటు డివైడర్లపైఅందమైన మొక్కలు పెంచారు. పార్కు చుట్టూ అందమైన వాటర్‌ ఫౌంటెన్లు ఏర్పాటు చేశారు. పార్కును మరింతసర్వాంగ సుందరంగా తీర్చిదిద్ది మే లో పార్కును జాతికి అంకితం చేయనున్నట్లు తుమ్మల వెల్లడించారు.