చంద్రబాబుకు వాజ్‌పేయి ఫోన్‌

న్యూఢిల్లీ: తెలుగుదేశం పార్టీ నాలుగు సూత్రాల డిమాండ్‌ను వాజ్‌పేయి ప్రభుత్వం ముందుపెట్టింది. గుజరాత్‌ పరిణామాలపై అభిశంసన తీర్మానంపై లోక్‌సభలో మంగళవారం చర్చలో పాల్గొంటూ- గుజరాత్‌ ముఖ్యమంత్రి నరేంద్ర మోడిని తప్పించాలని, ప్రస్తుత తరుణంలో రాష్ట్రంలో ఎన్నికలు నిర్వహించవద్దని తెలుగుదేశం డిమాండ్‌ చేసింది.

గుజరాత్‌ ప్రభుత్వంపై ప్రజలకువిశ్వాసం సన్నగిల్లిందని, రాష్ట్రంలో నాయకత్వాన్ని మార్చాల్సిన అవసరం ఉన్నదని తెలుగుదేశం పార్లమెంటరీ పార్టీ నేత కె.ఎర్రంనాయుడు అన్నారు. ప్రజల ప్రాణాలను, ఆస్తులను రక్షించడానికి రాజ్యాంగంలోని 355 అధికరణ కింద కేంద్రం ఆదేశాలు జారీ చేయాలని ఆయన డిమాండ్‌ చేశారు. బాధితులకు తగిన మేరకు సహాయ, పునరావాస చర్యలు చేపట్టాలని కూడా ఆయన డిమాండ్‌ చేశారు.

గుజరాత్‌ పరిణామాలు జాతిపై మాయని మచ్చలని ఆయన అన్నారు. మతంపేరుతో అనూహ్యమైన నేరాలు జరుగుతున్నాయని ఆయన అన్నారు. తాము ప్రజాస్వామ్య, లౌకిక సూత్రాలకు కట్టుబడి వున్నామని, గుజరాత్‌ పరిణామాలపై ఉమ్మడి ఆత్మ పరిశీలనను తమ పార్టీ కోరుకుంటోందని ఎర్రంనాయుడు చెప్పారు.