కాశ్మీర్‌పై చర్చలకు కేంద్రం రెడీ

శ్రీనగర్‌ః జమ్మూ కాశ్మీర్‌కు మరిన్ని అధికారాలు అప్పగించే విషయంలో ఆ రాష్ట్ర నేతలతో చర్చలు జరిపేందుకు కేంద్రం సిద్ధంగా వున్నదని ప్రధాని వాజ్‌పేయి హామీ ఇచ్చారు. సోమవారం నాడు జమ్మూకాశ్మీర్‌కు చెందిన ప్రతినిధి బృందం ప్రధానిని కలిసింది.

నేషనల్‌ కాన్ఫరెన్స్‌ కొత్త నేత, కేంద్ర మంత్రి ఒమర్‌ అబ్దుల్లా, ముఖ్యమంత్రి ఫరూఖ్‌ అబ్దుల్లా సారథ్యంలో ఈ ప్రతినిధి బృందం ప్రధానిని కలిసింది. రాష్ట్రానికి మరిన్ని అధికారాలు ఇచ్చేవిషయంలో చర్చలకు సిద్ధంగా వున్నట్టు ప్రధాని తెలిపారని ఒమర్‌ చెప్పారు. చర్చలకు ముందు వుండే ఆకాంక్షలు వేరని చర్చల దరిమిలా లభించే ప్రయోజనాలు వేరని ఒక ప్రశ్నకు సమాధానంగా ఒమర్‌ చెప్పారు. చర్చలకు జమ్మూకాశ్మీర్‌ తరఫున ప్రతినిధి బృందం తయారుగా వుందని ఇప్పుడు కేంద్ర ప్రభుత్వ చొరవ తీసుకుని ఒక బృందాన్ని నియమించడమే తరువాయని ఆయన చెప్పారు.