పార్లమెంట్‌లో పెట్రోల్‌ మంటలు

న్యూఢిల్లీః పెట్రోలు బంకులు, గ్యాస్‌ ఏజెన్సీల కేటాయింపు వ్యవహారంపై మంగళవారం నాడు కూడా పార్లమెంట్‌ ఉభయ సభలు అట్టుడికాయి. విపక్షాలను శాంతింపజేసి ప్రశ్నోత్తరాల సమయం కొనసాగించేందుకు చేసిన ప్రయత్నాలు విఫలం కావడంతో రెండు సభలు వాయిదా పడ్డాయి.

ఈ ఏడాది జనవరి నుంచి మంజూరు చేసినపెట్రోల్‌ బంకులు, గ్యాస్‌ ఏజెన్సీలను రద్దు చేస్తున్నట్టుగా ప్రధాని వాజ్‌పేయి సోమవారం రాత్రి చేసిన ప్రకటన ప్రతిపక్షాలను సంతృప్తిపర్చలేకపోయింది. రాజ్యసభలో ప్రశ్నోత్తరాల సమయంలోనేవిపక్షాలు పెట్రోల్‌ బంకుల వ్యవహారాన్ని లేవనెత్తాయి.పెట్రోలియం శాఖ మంత్రి రామ్‌నాయక్‌ రాజీనామాకు డిమాండ్‌ చేశాయి. ప్రశ్నోత్తరాల సమయాన్ని అడ్డుకోరాదని సభాధ్యక్ష స్థానంలో వున్న డిప్యూటీ చైర్మన్‌ నజ్మా చేసినవిన్నపాలను వారు పట్టించుకోలేదు. ఈ దశలో అధికార ప్రతిపక్ష సభ్యులకు మధ్య తీవ్ర స్థాయిలో గొడవ జరిగింది. గందరగోళం తీవ్ర స్థాయికి చేరడంతో సభను బుధవారానికి వాయిదా వేస్తున్నట్టుగా నజ్మా ప్రకటించారు.

లోక్‌సభలో కూడా దాదాపు ఇదే పరిస్థితి కనిపించింది. రామ్‌నాయక్‌

రాజీనామాకు పట్టుబట్టిన విపక్షాలు ప్రశ్నోత్తరాల సమయాన్ని అడ్డుకోవడంతోస్పీకర్‌ మనోహర్‌ జోషి సభను బుధవారానికి వాయిదా వేస్తున్నట్టుగా ప్రకటించారు.