వార్‌ తో చర్చలు కొనసాగించాలి

హైదరాబాద్‌ః అర్థాంతరంగా నిలిచిపోయినపీపుల్స్‌ వార్‌ తో చర్చల వ్యవహారం కొనసాగించాలని పీస్‌ ఇనిషియేటివ్‌ కమిటీ డిమాండ్‌ చేసింది. గురువారం హైదరాబాద్‌ లో జరిగినవిలేకర్ల సమావేశంలో ఈ కమిటీ నేత బొజ్జా తారకం, ఎబికె ప్రసాద్‌ తదితర ప్రముఖులు మాట్లాడారు.పీపుల్స్‌ వార్‌ కు ప్రభుత్వానికి మధ్య ప్రారంభం కావలసిన చర్చలకు పురిట్లోనే సంధి కొట్టడానికి ప్రభుత్వ వైఖరి కూడా కొంత కారణం అని బొజ్జా తారకం ఆరోపించారు.

పీపుల్స్‌ వార్‌ తో చర్చలు జరుపుతామంటూనే పోలీసుల చేత వరసగా ఎన్‌ కౌంటర్లు చేయిస్తుంటే శాంతి ఎలా సాధ్యం అని వారు ప్రశ్నించారు. కూంబింగ్‌ ఆపరేషన్లు ఆపాలని, ఎన్‌ కౌంటర్లకుస్వస్తి చెప్పడం ద్వారా చర్చలకు మార్గం సుగమం చేయాలని వారు డిమాండ్‌ చేశారు. ప్రభుత్వానికి చిత్తశుద్ధి వుంటే చర్చలు మళ్ళీ ప్రారంభించాలని వారుకోరారు. చర్చలకు వచ్చే నక్సలైట్లకు సేఫ్‌ పాసేజ్‌ కల్పిస్తామని ప్రభుత్వం హామీ ఇస్తున్నప్పటికీ మరోవైపు ఎన్‌ కౌంటర్లు కూడా చేస్తూ పోతున్నదని ఈ తరుణంలో చర్చలు ఎలా సాధ్యం అని వారు ప్రశ్నించారు.