పెట్రోస్కామ్‌ కాంగ్రెస్‌ ధర్నాలు

హైదరాబాద్‌ః పెట్రోల్‌ బంకుల స్కామ్‌పై ఆంధ్రప్రదేశ్‌ కాంగ్రెస్‌ కమిటీ శుక్రవారం నాడు రాష్ట్రవ్యాప్తంగా ఆందోళన కార్యక్రమాన్ని నిర్వహించింది. జాతీయ స్థాయిలో కాంగ్రెస్‌ నిర్వహించిన ఆందోళనలో భాగంగా రాష్ట్రంలో కూడా ధర్నాలు, ప్రదర్శనలు జరిపారు. హైదరాబాద్‌లో పిసిసి నేత ఎంఎస్‌ఆర్‌ ఇతర సీనియర్‌ నేతల సారథ్యంలో ధర్నా జరిగింది.

బిజెపి నేత వెంకయ్యనాయుడు భూముల అక్రమణ వ్యవహారాన్ని ఆయన తీవ్రంగా తూర్పారబట్టారు. కేంద్రంలో బిజెపి, రాష్ట్రంలో తెలుగుదేశం అవినీతిలో పోటీపడుతున్నాయని ఆయన దుయ్యబట్టారు.విజయవాడ, విశాఖపట్నం, తిరుపతి, రాజమండ్రి, కడప, కర్నూలు, అనంతపురం, కరీంనగర్‌, నిజామాబాద్‌తో సహా పలు ప్రధాన నగరాల్లో కాంగ్రెస్‌ కార్యకర్తలు ధర్నాలు నిర్వహించారు.పెట్రోల్‌ స్కామ్‌కు కారణమైన మంత్రి రామ్‌నాయక్‌ రాజీనామా చేయాలని వారు డిమాండ్‌ చేశారు. కరీంనగర్‌లో ధర్నా నిర్వహించిన కాంగ్రెస్‌ కార్యకర్తలు కేంద్ర మంత్రివిద్యాసాగర్‌రావుకు వ్యతిరేకంగా నినాదాలు చేశారు.పెట్రోల్‌ బంకుల కేటాయింపులో ఆశ్రితపక్షపాతానికి పాల్పడిన మంత్రి రాజీనామా చేయాలని వారు డిమాండ్‌ చేశారు.