కానిస్టేబుల్‌ విడుదలకు చర్యలుః బాబు

హైదరాబాద్‌ః ఇంకా నక్సలైట్లు చెరలో బందీగా వున్న కానిస్టేబుల్‌ చిట్టిబాబు విడుదలకు అన్ని చర్యలు తీసుకుంటున్నట్లు ముఖ్యమంత్రి చంద్రబాబు నాయుడు ప్రకటించారు. ఆదాయంపన్నుల శాఖ కొత్తభవనానికి సోమవారం ఆయన హైదరాబాద్‌ లో శంకుస్థాపన చేశారు. 26 కోట్ల రూపాయలతో 10 అంతస్తులతో అత్యంత అధునాతనంగా ఈ ఆదాయంపన్నుల శాఖ భవనాన్ని
నిర్మిస్తున్నారు.

ఈ సందర్భంగా చంద్రబాబు మాట్లాడుతూ ఇన్ఫర్మేషన్‌ టెక్నాలజీ, హార్డ్‌ వేర్‌, బయోటెక్నాలజీ సంస్థలను ప్రోత్సహించడం ద్వారా పన్ను వసూళ్ళను గణనీయంగాపెంచుకోవచ్చునన్నారు. ఈ రంగాలను ప్రోత్సహించడం ద్వారా కేంద్రానికి ప్రత్యక్షంగా ప్రతిఫలం రానప్పటికీ పరోక్షంగా పన్నుల రూపంలో ఎంతో ఆదాయం లభిస్తుందని ఆయన చెప్పారు. అనంతరం చిట్టిబాబు విడుదల గురించి ఏంచర్యలు తీసుకుంటున్నారనివిలేకర్లు చంద్రబాబును ప్రశ్నించారు. డిజిపి, హోం మంత్రి చిట్టిబాబు విడుదలకు ప్రయత్నాలు చేస్తున్నారని ఆయన చెప్పారు. వారిద్దరు రెండు రోజులుగా చేస్తున్న కృషి ఫలితంగానే నలుగురు పోలీసులు విడుదలయ్యారని, చిట్టిబాబు కూడా త్వరలో విడుదలవుతారని ఆయన ఆశాభావం వ్యక్తం చేశారు.