సమతా పీఠంపై ఫెర్నాండెజ్‌

న్యూఢిల్లీః అసమ్మతితో అల్లకల్లోలంగా వున్న సమతాపార్టీ నాయకత్వ పగ్గాలను రక్షణ శాఖ మంత్రి జార్జి ఫెర్నాండెజ్‌ చేపట్టారు. ఇంతకు ముందు పార్టీ అధ్యక్షుడిగా వున్నవి.వి. కృష్ణారావు పదవి నుంచి తప్పుకోవడంతో జార్జి ఈ ముళ్ళ కిరీటాన్ని ఆదివారం నెత్తికెత్తుకున్నారు.

72 ఏళ్ళ ఫెర్నాండెజ్‌పేరును పార్టీ అత్యున్నత పదవికి రైల్వే మంత్రి నితీష్‌ కుమార్‌ ప్రతిపాదించారు. బీహార్‌, జార్ఖండ్‌ రాష్ట్రాలలో సమాతాపార్టీ తీవ్ర ఇబ్బందులు ఎదుర్కొంటున్న తరుణంలో జార్జి ఈ పదవి చేపట్టారు. సమాతా పార్టీ వ్యవస్థాపకుడైన ఫెర్నాండెజ్‌ ఎన్నికల సంఘం ఆదేశం మేరకు 2000సంవత్సరంలో పార్టీ పదవి నుంచి వైదొలగారు. ఆ తరువాత పార్టీ పగ్గాలను జయాజైట్లీ చేపట్టారు. తెహల్కా ఆరోపణల తరువాత ఆమె కూడా పార్టీ సారధ్యాన్ని వదులుకున్నారు. వత్తిళ్ళు తట్టుకోలేక కొత్త అధినేత కృష్ణారావు తప్పుకోవడంతో మళ్ళీ పగ్గాలు చేపట్టక ఫెర్నాండెజ్‌ కు తప్పలేదు.