ఆంధ్రపై కర్ణాటక పిటిషన్‌ ఉపసంహరణ

న్యూఢిల్లీ: కృష్ణానదిపై ఐదు నీటి పారుదల ప్రాజెక్టుల నిర్మాణాలను ఆపేయాలని ఆంధ్రప్రదేశ్‌ ప్రభుత్వాన్ని ఆదేశించాలని కోరుతూ సుప్రీంకోర్టులో దాఖలు చేసిన రిట్‌ పిటిషన్‌ను కర్ణాటక ప్రభుత్వం ఉపసంహరించుకుంది. కృష్ణానదిపై తెలుగుగంగ,శ్రీశైలం ఎడమగట్టు కాలువ (ఎస్‌ఎల్‌బిసి)లతో పాటు మరో మూడు నీటి పారుదల ప్రాజెక్టుల నిర్మాణాలను ఆపేయాలని ఆంధ్రప్రదేశ్‌ను ఆదేశించాలని కోరుతూ కర్ణాటక ప్రభుత్వం ఈ రిట్‌ పిటిషన్‌ను దాఖలు చేసింది.

ఆ విధమైన ఆదేశాలను ఇవ్వలేమని సుప్రీంకోర్టు స్పష్టం చేయడంతో కర్ణాటక ప్రభుత్వం ఆ పిటిషన్‌ను ఉపసంహరించుకుంది. ఇదే విధమైన పిటిషన్‌ను కర్ణాటక ప్రభుత్వం 1992లో సుప్రీంకోర్టులో దాఖలు చేసింది. దీనిపై సుప్రీంకోర్టు స్పందిస్తూ- ఈవిషయమై ఒక ట్రిబ్యునల్‌ ఏర్పాటు చేయాలని కేంద్ర ప్రభుత్వాన్ని కోరాలని కర్ణాటక ప్రభుత్వానికి సూచించింది. అయితే, కర్ణాటక ప్రభుత్వం కేంద్ర ప్రభుత్వం వద్దకు వెళ్లేవిషయంలో సుప్రీంకోర్టు సూచనను పాటించలేదు. తిరిగి అదే విధమైన పిటిషన్‌ను కర్ణాటక ప్రభుత్వం సుప్రీంకోర్టులో దాఖలుచేసింది. గతంలో తాము చేసిన సూచన మేరకు ట్రిబ్యునల్‌ ఏర్పాటుకు కేంద్ర ప్రభుత్వాన్ని కోరనందున తిరిగి ఇప్పుడు వెళ్లాలని సుప్రీంకోర్టు ప్రస్తుతం కర్ణాటక ప్రభుత్వానికి సూచించింది. దీంతో కర్ణాటక ప్రభుత్వం తన రిట్‌ పిటిషన్‌నుఉపసంహరించుకుంది.