డొనాల్డ్‌ బౌలింగ్‌పైనే సౌతాఫ్రికా ఆశ

కొలంబోః ఐసిసి ఛాంపియన్‌ ట్రోఫీసెమీఫైనల్‌ లో బుధవారం నాడు భారత్‌ - దక్షిణాఫ్రికాలు తలపడనున్నాయి. ప్రేమదాస స్టేడియం పేస్‌ బౌలింగ్‌ కు బాగా అనుకూలంగా వుండడంతో డొనాల్డ్‌ ను బరిలోకి దించి భారత్‌ ఆట కట్టించాలని షాన్‌ పొలాక్‌ భావిస్తున్నాడు. పేస్‌ బౌలర్లను ప్రధానఅస్త్రాలుగా ఉపయోగించి భారత్‌ బ్యాట్స్‌ మెన్‌ ను కట్టడి చేయాలనేది పొలాక్‌ అలోచన.

ప్రేమదాస స్టేడియంలో బౌలింగ్‌ లోను, బ్యాటింగ్‌ లోను అద్భుతంగా రాణించి, ఇంగ్లాండ్‌ ను మట్టికరిపించిన భారత్‌ మంచి ఊపులో వుంది. ఇంగ్లాండ్‌ కంటే సౌతాఫ్రికా బలమైన జట్టుకాబట్టి కొత్త వ్యూహంతో, మరింత ఉత్సాహంతో ఆడితే తప్ప భారత్‌ కువిజయం సాధ్యం కాదని జట్టు కోచ్‌ జాన్‌ రైట్‌ చెబుతున్నాడు. ఏడుగురు బ్యాట్స్‌ మెన్‌ తో బరిలోకి దిగాలా లేకఅగార్కర్‌ ను కూడా జట్టులోకి తీసుకోవాలా అని భారత్‌ యోచిస్తున్నది.

ఆదివారం నాటి విజయంతో రాత్రి పొద్దుపోయే వరకు పార్టీలతో గడిపిన భారత్‌ జట్టు సోమవారం మధ్యాహ్నం వరకు ముసుగుతన్ని నిద్రపోయింది. మంగళవారం ఉదయం నుంచి తీవ్రంగా ప్రాక్టీస్‌ ప్రారంభించింది. మంచి ఊపులో వున్న భారత్‌ జట్టు అదే జోరు కొనసాగిస్తుందా లేదా వేచి చూడాల్సిందే