బాబు పాలనపైఎస్వీ అసంతృప్తి

కర్నూలు: తెలుగుదేశం పార్టీ పాలనపై మాజీ మంత్రి, పార్టీసీనియర్‌ శాసనసభ్యుడు ఎస్వీ సుబ్బారెడ్డి అసంతృప్తి వ్యక్తం చేశారు. తెలుగుదేశం అనుబంధ సంస్థల కార్యకర్తల సమావేశంలో ఆయన సోమవారం తన అసంతృప్తిని వ్యక్తం చేశారు. ఈ సమావేశంలో మంత్రిబి.వి. మోహన్‌ రెడ్డి కూడా ఉన్నారు.

ఎస్వీ సుబ్బారెడ్డిస్వర్గీయ ఎన్‌.టి. రామారావు మంత్రివర్గంలోనే కాకుండా నారా చంద్రబాబునాయుడి మంత్రి వర్గంలో కూడా పని చేశారు. అయితే ఆయనను చంద్రబాబు మంత్రివర్గం నుంచి తొలగించారు.అప్పటి నుంచి ఆయన అసంతృప్తితో ఉన్నారు. తెలుగుదేశం పాలనలో అవినీతిపెరిగిపోయిందని, దీంతో ప్రభుత్వ మనుగడే ప్రశ్నార్థకంగా మారుతోందని సుబ్బారెడ్డి అన్నారు. ఓనమాలు తెలియనివారు మంత్రులుగా ఉన్నారని ఆయన అభిప్రాయపడ్డారు. రాజకీయ నాయకుల్లో కూడా అవినీతిపెరిగిపోయిందని, దీన్ని అరికట్టకపోతే వచ్చే ఎన్నికల్లో తెలుగుదేశం పార్టీ గెలవడం కష్టమని ఆయన అన్నారు. పదవి రాకపోయినా, అసంతృప్తితో ఉన్నా మాతృసంస్థను విడిపోకూడదని ఆయన అన్నారు. ఈ మాట ద్వారా ఆయన తెలుగుదేశం పార్టీలో కొనసాగుతాననే సూచననుఅందించినట్లయింది.