మా వల్లే ఎన్టీఆర్‌ వచ్చారు: ఎమ్మెస్సార్‌

హైదరాబాద్‌: కాంగ్రెస్‌ స్వయంకృతాపరాధం వల్లనే రాష్ట్రంలో అధికారం కోల్పోయిందని ప్రదేశ్‌ కాంగ్రెస్‌ కమిటీ (పిసిసి) అధ్యక్షుడు ఎం. సత్యనారాయణ రావు అన్నారు. కాంగ్రెస్‌ అనుబంధ విద్యార్థి సంఘం ఎన్‌ఎస్‌యుఐ సమావేశంలో ఆయన మంగళవారం ప్రసంగించారు.

కాంగ్రెస్‌లోని అంతర్గత కుమ్ములాటలు, విభేదాల వల్లనే కాంగ్రెస్‌ ఓడిపోయి స్వర్గీయ ఎన్‌.టి. రామారావు నాయకత్వంలో ఏర్పడిన తెలుగుదేశం పార్టీ అధికారంలోకి వచ్చిందని ఆయన అన్నారు. నటుడిగా ఎన్టీఆర్‌ గొప్పవారని, అయితే ఆయనకు పార్టీల గురించి, రాజకీయాల గురించి ఏమీ తెలియదని, వార్తా పత్రికలు కూడా చదివేవారు కారని, అటువంటి ఎన్టీఆర్‌ పార్టీ పెట్టి అకస్మాత్తుగా అధికారంలోకి వచ్చారని, ఇదంతా కాంగ్రెస్‌ స్వయంకృతాపరాధమేనని ఆయన అన్నారు. విద్యార్థుల నుంచి నాయకులను తయారు చేయకపోవడం వల్లనే కేంద్రంలో బిజెపి, రాష్ట్రంలో తెలుగుదేశం పార్టీ అధికారంలో ఉన్నాయని ఆయన అభిప్రాయపడ్డారు.