గవర్నర్‌తో సయీద్‌, ఆజాద్‌ల భేటీ

శ్రీనగర్‌: జమ్మూ కాశ్మీర్‌ ముఖ్యమంత్రి అభ్యర్థి, పీపుల్స్‌ డెమొక్రటిక్‌ పార్టీ (పిడిపి) నేత ముఫ్తీ మహ్మద్‌ సయీద్‌ బుధవారం గవర్నర్‌ జి.సి. సక్సేనాను కలుసుకున్నారు. తాము సంకీర్ణ ప్రభుత్వం ఏర్పాటు చేయగలమని ఆయన గవర్నర్‌కు చెప్పారు.

ఆయనతో పాటు జమ్మూ కాశ్మీర్‌ ప్రదేశ్‌ కాంగ్రెస్‌ కమిటీ అధ్యక్షుడు గులాం నబీ ఆజాద్‌ కూడా గవర్నర్‌ను కలుసుకున్నారు. 52 మంది శాసనసభ్యుల బలం తమకు ఉన్నదని వారు గవర్నర్‌కు చెప్పారు. శాసనసభ్యుల సంతకాలతో కూడిన జాబితాను వారు గవర్నర్‌కు అందజేశారు. సంకీర్ణ ప్రభుత్వ ఏర్పాటుకు పిడిపికి, కాంగ్రెస్‌కు మధ్య ఒక అవగాహన కుదిరింది. ఈ ప్రభుత్వానికి పాంథర్స్‌ పార్టీ, సిపిఐ మద్దతు తెలియజేస్తున్నాయి. దీంతో ముఫ్తీ నేతృత్వంలో సంకీర్ణ ప్రభుత్వ ఏర్పాటుకు మార్గం ఏర్పడింది. సయీద్‌ శనివారం పదవీ స్వీకార ప్రమాణం చేసే అవకాశాలున్నాయి.