ఉగ్రవాదానికి కేంద్రంపాక్‌: అద్వానీ

హైదరాబాద్‌: ప్రపంచ ఉగ్రవాదానికి పాకిస్థాన్‌ ప్రధాన కేంద్రమైందని కేంద్ర హోం మంత్రి, ఉప ప్రధాని ఎల్‌.కె. అద్వానీ అన్నారు. సీమాంతర ఉగ్రవాదంపై భారత్‌ కఠినంగా వ్యవహరిస్తుందని ఆయన చెప్పారు.

సర్దార్‌ వల్లభ్‌ బాయ్‌ పటేల్‌ జాతీయ పోలీసు అకాడమీలో 54వ బ్యాచ్‌ ఐపిఎస్‌ అధికారుల పాసింగ్‌ అవుట్‌ పరేడ్‌లో ఆయన గురువారం ప్రసంగించారు. పాకిస్థాన్‌పై మూడు ప్రత్యక్ష యుద్ధాల్లో విజయం సాధించినట్లుగానే ప్రచ్ఛన్న యుద్ధంలో కూడా మనం విజయం సాధిస్తామని ఆయన అన్నారు. ప్రపంచం ఏమన్నా, ఏం చేసినా మనం ప్రచ్ఛన్న యుద్ధం చేస్తున్నవారిని అంతిమంగా, నిర్ణయాత్మకంగా ఓడిస్తామని ఆయన ధీమా వ్యక్తం చేశారు.

జమ్మూ కాశ్మీర్‌ను లాక్కోవడానికి పాకిస్థాన్‌ వివిధ వ్యూహాలు పన్నిందని, అయితే దయనీయంగా ఓడిపోయిందని ఆయన అన్నారు. కాశ్మీర్‌ సమస్యకు యుద్ధం పరిష్కారం కాదని భారత్‌ మొదటి నుంచి చెప్తూ వస్తోందని, ప్రజాస్వామిక, నాగరిక దేశమేదీ యుద్ధం గురించి మాట్లాడబోదని ఆయన అన్నారు.