ఆంధ్రలో అపార చమురు నిల్వలు

ముంబాయి: గోదావరి- కృష్ణా బేసిన్‌లో రిలయన్స్‌ సంస్థ అపారమైన చమురు నిల్వలను కనుగొన్నది. ఈ నిల్వలు దేశ ఇంధన సరఫరా ఆర్థిక వ్యవస్థ తీరుతెన్నులనే మార్చే అవకాశాలున్నాయి. బొంబాయి హై ఫీల్డ్‌లో కన్నా ఈ నిల్వలు 40 శాతం అధికమని అంచనా వేశారు. దీంతో చమురు, సహజ వాయువుల సంస్థ మొత్తం సహజవాయువు ఉత్పత్తి ద్విగుణీకృతమవుతుంది.

గోదావరి- కృష్ణా బేసిన్‌లో చమురు నిల్వలను కనుగొన్న విషయాన్ని అంబానీలు గురువారం తమ కంపెనీ వార్షిక సర్వసభ్య సమావేశంలో ప్రకటించారు. కృష్ణా- గోదావరి బేసిన్‌లోని చమురు నిల్వలను వెలికి తీయడానికి ఏడు వేల కోట్ల రూపాయలకు పైగా ఖర్చు చేస్తుందని రిలయన్స్‌ సంస్థకు చెందిన ముఖేష్‌ అంబానీ ప్రకటించారు. కృష్ణా- గోదావరి బేసిన్‌లోని నిల్వల వల్ల దేశంలోని సహజవాయువు ఉత్పత్తి 60 శాతం పెరుగుతుందని అంచనా. ఇక చమురును దిగుమతి చేసుకోవాల్సిన అవసరం దేశానికి ఉండదు. ఈ నిల్వలకు తమ తండ్రి ధీరూబాయ్‌ అంబానీ పేరు పెట్టినట్లు ముఖేష్‌ అంబానీ చెప్పారు. కృష్ణా- గోదావరి బేసిన్‌లోని నిల్వల గురించి ప్రకటించిన వెంటనే రిలయన్స్‌ షేర్‌ ధర 14 శాతం పెరిగింది.