మైనారిటీ విద్యాసంస్థలకు హక్కు:సుప్రీం

న్యూఢిల్లీ: మత ప్రాతిపదికపై విద్యాసంస్థలను స్థాపించి, నడిపించే హక్కు మైనారిటీ సమాజానికి ఉన్నదని సుప్రీంకోర్టు స్పష్టం చేసింది. ప్రభుత్వాల నుంచి సహాయం పొందే విద్యాసంస్థలు మాత్రం ఆయా రాష్ట్ర ప్రభుత్వాల నియమనిబంధనలకు అనుగుణంగా పని చేయాలని సుప్రీంకోర్టు తెలియజేసింది.

ప్రధాన న్యాయమూర్తి బి.ఎన్‌. కృపాల్‌ నేతృత్వంలోని 11 మంది న్యాయమూర్తుల రాజ్యాంగ ధర్మాసనం గురువారం ఈ చారిత్రకమైన తీర్పు ఇచ్చింది. ప్రభుత్వం నుంచి సహాయం పొందే మైనారిటీ విద్యాసంస్థలు మత, కుల, జాతి, భాషా ప్రాతిపదికలపై విద్యార్థులకు అడ్మిషన్లను నిరాకరించకూడదని సుప్రీంకోర్టు చెప్పింది. పారదర్శకంగా ఉన్నంత వరకు మైనారిటీ విద్యాసంస్థల నిర్వహణకు యాజమాన్యాలకు పూర్తి స్వేచ్ఛ ఉన్నదని సుప్రీంకోర్టు స్పష్టం చేసింది. సహాయం పొందని మైనారిటీ విద్యాసంస్థల యాజమాన్యంలో ఆ సంస్థలు మెరిట్‌కు ప్రాధాన్యం ఇచ్చి, పారదర్శకంగా వ్యవహరిస్తే ప్రభుత్వం గానీ, సంబంధిత విశ్వవిద్యాలయం గానీ జోక్యం చేసుకోకూడదని సూచించింది.