ఇద్దరు మిలిటెంట్లు, 4గురు జవాన్లు మృతి

శ్రీనగర్‌: శ్రీనగర్‌లో జరిగిన భారీ ఎన్‌కౌంటర్‌లో ఇద్దరు మిలిటెంట్లతో పాటు నలుగురు భద్రతా బలగాల సిబ్బంది మరణించారు. బుధవారంనాడు శ్రీనగర్‌లోని లాల్‌చౌక్‌లో ప్రారంభమైన ఎన్‌కౌంటర్‌ దాదాపు 24 గంటల పాటు సాగి గురువారంనాడు ముగిసింది. ఈ ఎన్‌కౌంటర్‌లో 17 మంది గాయపడ్డారు. గాయపడినవారిలో నలుగురు పౌరులు ఉన్నారు.

హోటల్‌లోకి చొరబడి బయటకు రావడానికి ప్రయత్నించిన ఇద్దరు ఆల్‌ మన్సూరియన్‌ మిలిటెంట్లను భద్రతా బలగాలు కాల్చి చంపాయి. హోటల్‌ లోపలి నుంచి ఏ విధమైన కాల్పులు జరగడం లేదని, అందువల్ల ఎన్‌కౌంటర్‌ ముగిసిందని అనుకుంటున్నామని భద్రతా బలగాల అధికారి ఒకరు చెప్పారు. మృతుల్లో ఒక జవాను, ఇద్దరు స్పెషల్‌ ఆపరేషన్‌ గ్రూప్‌ అధికారులు, ఒక జమ్మూ కాశ్మీర్‌ పోలీసు ఉన్నారు. భద్రతా బలగాలు గాలింపు జరుపుతున్నారు.