ల్యాంకోహిల్స్ కు భూకేటాయింపుపై స్టే

హైదరాబాద్: హైదరాబాదులోని ఖరీదైన ప్రాంతం మణికొండలో ల్యాంకోహిల్స్ కు ప్రభుత్వం జరిపిన భూకేటాయింపుపై రాష్ట్ర హైకోర్టు గురువారం స్టే ఇచ్చింది. తదుపరి ఉత్తర్వులు వెలువడే వరకు ఏ విధమైన నిర్మాణాలు చేపట్టకూడదని హైకోర్టు ఆదేశాలు జారీ చేసింది. మణికొండలో ల్యాంకోహిల్స్ కే కాకుండా కొన్ని ఐటి కంపెనీలకు ప్రభుత్వం 17 వందల ఎకరాలు కేటాయించింది. ఈ కేటాయింపును సవాల్ చేస్తూ తెలంగాణ రాష్ట్ర సమితి (తెరాస) నాయకుడు రెహ్మాన్ పిటిషన్ దాఖలు చేశారు.

మణికొండలో ల్యాంకోహిల్స్ కోట్ల రూపాయలకు 120 ఎకరాల భూమిని కొనుగోలు చేసింది. ఆ భూమిలో ల్యాంకోహిల్స్ నివాస సముదాయాల నిర్మాణానికి పూనుకుంది. ఈ భూమి కేటాయింపుపై హైకోర్టు స్టే ఇవ్వడం వల్ల తమకొచ్చే నష్టమేమీ లేదనే ధీమాతో ల్యాంకోహిల్స్ ఉంది. ప్రభుత్వానికి డబ్బు చెల్లించి తాము భూమిని కొలుగోలు చేశామని, తమకు భూమిని అప్పగించే పని ప్రభుత్వమే చూసుకుంటుందని కంపెనీ యాజమాన్యం అంటోంది.