మాయావతిపై గుర్రుమన్న రోజా

హైదరాబాద్: ఉత్తరప్రదేశ్ ముఖ్యమంత్రి, బహుజన సమాజ్ (బియస్పీ) అధ్యక్షురాలు మాయావతిపై తెలుగు మహిళ అధ్యక్షురాలు, సినీ నటి రోజా గుర్రుమన్నారు. సినీనటులకు ప్రజాసేవ చేత కాదని మాయావతి ఆదివారం హైదరాబాదు బహిరంగ సభలో అనడాన్ని ఆమె సోమవారం మీడియా ప్రతినిధుల సమావేశంలో ఖండించారు. ఎవర్నో ఒకర్ని లక్ష్యంగా పెట్టుకుని మాయావతి ఆ ప్రకటన చేసినట్లున్నారని, సినీ కళాకారులందరినీ ఉద్దేశించి చేసింది కాదనిపిస్తోందని ఆమె అన్నారు.

రాజకీయాల్లోకి వచ్చి ప్రజల గుండెల్లో చిరస్థాయిగా నిలిచిపోయిన సినీ కళాకారులున్నారని ఆమె గుర్తు చేశారు. సినీ నటులు పనికి వస్తారా, లేదా అనేది ప్రజలు నిర్ణయిస్తారని, మనం నిర్ణయించేది కాదని రోజా అన్నారు. సినీ కళాకారులు ప్రజాసేవకు పనికి రారనే హక్కు మనకు లేదని ఆమె అన్నారు.