కెసిఆర్ అంగీకారం: మొయిలీ

హైదరాబాద్: తెలంగాణపై మొదటి ఎస్సార్సీని గౌరవిస్తూ రెండో ఎస్సార్సీ వేయడానికి తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు కూడా ఒప్పుకున్నారని కాంగ్రెస్ ఆంధ్రప్రదేశ్ వ్యవహారాల మంత్రి వీరప్ప మొయిలీ చెప్పారు. 2004 ఎన్నికల సందర్భంగా తమకు, తెరాసకు మధ్య జరిగిన ఒప్పందం పత్రాన్ని ఆయన బుధవారం సాయంత్రం మీడియా ప్రతినిధుల సమావేశంలో చదివి వినిపించారు. చిన్న రాష్ట్రాల ఏర్పాటుకు రెండో రాష్ట్రాల పునర్విభజన కమీషన్ (రెండో ఎస్సార్సీ)ని వేయడం ఖాయమని ఆయన స్పష్టం చేశారు. ప్రస్తుత రాజకీయ పరిస్థితుల దృష్ట్యా తెలంగాణ, విదర్భలపై రెండో ఎస్సార్సీ వేయాలని నిర్ణయించుకున్నామని ఆయన చెప్పారు.

విదర్భ, తెలంగాణ రాష్ట్రాల ఏర్పాటుకు తమ పార్టీ అధ్యక్షురాలు సోనియా గాంధీ ప్రాధాన్యం ఇస్తున్నారని ఆయన చెప్పారు. తాను తెలంగాణపై సోనియా సూచన మేరకు ప్రణబ్ ముఖర్జీతో కలిసి చర్చించానని, తెలంగాణపై యుపిఎ భాగస్యామ్య పక్షాల మధ్య ఏకాభిప్రాయం కుదరలేదని, దాంతో కొత్తగా ఎస్సార్సీ వేయాలని ప్రణబ్ కమిటీ సూచించవచ్చునని ఆయన అన్నారు. రెండో ఎస్సార్సీ వేయడానికి రంగం సిద్ధం అవుతోందని ఆయన చెప్పారు. ప్రజల్లో ఉన్న తీవ్రమైన తెలంగాణ ఆకాంక్షను తాము పరిగణనలోకి తీసుకుంటామని, తెలంగాణ నాయకుల మాటలను పరిగణనలోకి తీసుకుంటామని ఆయన చెప్పారు.