ఇంత నీచం కాంగ్రెసుకే చెల్లింది: కెసిఆర్

హైదరాబాద్: తెలంగాణపై ఇంత నీచానికి పాల్పడడం కాంగ్రెసుకే చెల్లిందని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు వ్యాఖ్యానించారు. రెండో ఎస్సార్సీకి తాను అంగీకరించినట్లు ఆంధ్రప్రదేశ్ కాంగ్రెస్ వ్యవహారాల ఇంచార్జీ వీరప్ప మొయిలీ చేసిన ప్రకటనను ఆయన ఖండించారు. ఏ విషయంలోనైనా ఇటీవలి పత్రాలనే పరిగణనలోకి తీసుకోవాలని, యుపిఎ ఉమ్మడి ప్రణాళికకే తెలంగాణ విషయంలో తాము కట్టుబడి ఉన్నామని ప్రణబ్ ముఖర్జీ చెప్పారని, తెలంగాణ ఏర్పాటు చేస్తామని ప్రధాని కూడా ప్రకటించారని ఆయన వివరించారు. తెలంగాణను మోసం చేసినవారి జాబితాలో చేరిపోతారో, తెలంగాణ ఇస్తారో సోనియా గాంధీ తేల్చుకోవాలని ఆయన అన్నారు. తెలంగాణ కాంగ్రెస్ శాసనసభ్యులు, లోక్ సభ సభ్యులు రాజీనామా చేసి తిరిగి పోటీకి సిద్ధపడాలని ఆయన డిమాండ్ చేశారు.

రెండో ఎస్సార్సీకి వ్యతిరేకంగా రేపట్నుంచీ ఆందోళనను దిగనున్నట్లు ఆయన తెలిపారు. ఈ నెల 16, 17 తేదీల్లో నిరసన ధర్నాలు, రాస్తారోకోలు నిర్వహిస్తామని ఆయన చెప్పారు. ఈ నెల 24వ తేదీన కరీంనగరులో నిరసనసభ జరుగుతుందని ఆయన చెప్పారు. ఆ తర్వాత విద్యార్థుల కార్యక్రమం ఉంటుందని ఆయన చెప్పారు. అప్పటికి కూడా దిగిరాకపోతే కాంగ్రెస్ ప్రజాప్రతినిధులను ఎక్కడికక్కడ అడ్డుకుంటామని ఆయన చెప్పారు. కాంగ్రెస్ నమ్మకద్రోహానికి, అబద్ధాలకు, వాస్తవాల వక్రీకరణకు పాల్పపడుతోందని ఆయన విమర్శంచారు. తెలంగాణలో కాంగ్రెస్ పతనం తప్పదని ఆయన అన్నారు. కరీంనగరులో రెండు లక్షలకు పైగా మెజారిటీతో గెలిచామని, ఇంతకన్నా ప్రజాభిప్రాయం ఏముంటుందని ఆయన అన్నారు. తెలంగాణపై ఏకాభిప్రాయం సాధించలేదనేది నిజం కాదని ఆయన అన్నారు. కాంగ్రెస్ నిజాలను తొక్కి పెడుతోందని ఆయన విమర్శించారు.