లక్ష కారును ఆవిష్కరించిన టాటా

ఢిల్లీ: ఢిల్లీలోని ప్రగతి మైదానులో లక్ష రూపాయల కారు నమూనాను టాటా మోటార్స్ చైర్మన్ రతన్ టాటా గురువారం ఉదయం పదకొండున్నర గంటలకు ఆవిష్కరించారు. ప్రగతి మైదానులో ఆటో ఎక్స్ పో - 2008లో ఆయన ఈ కారును ఆవిష్కరించారు. ఈ కారును చూడడానికి పెద్ద సంఖ్యలో ప్రజలు గుమిగూడారు. తోపులాట కూడా చోటు చేసుకుంది. సెక్యూరిటీ సిబ్బందితో ప్రజలు గొడవ పడ్డారు.

ఈ ఏడాది సెప్టెంబరులో లక్ష రూపాయల కారును టాటా మోటార్స్ మార్కెట్లోకి విడుదల చేస్తుంది. ఈ కారుకు టాటా- నానోగా నామకరణం చేశారు. దీన్ని 30 లీటర్ల పెట్రోల్ పట్టేలా రూపొందించారు. లక్ష రూపాయల కారును రతన్ టాటా నడుపుకుంటా వచ్చారు. పసుపు, ఎరుపు, తెలుపు రంగుల్లో ఈ కారును విడుదల చేస్తారు. దేశంలోని మధ్యతరగతివారికి అందుబాటులో ఉండేలా దీని ధరను నిర్ణయించి అందుకు అనుగుణంగా రూపొందించారు. ఈ కారు ఇంజన్ సామర్థ్యం 600 సిసి. ఈ కారు ఆవిష్కరణతో టాటా మోటారు షేర్లు నాలుగు శాతం పెరిగాయి.