బిసి స్త్రీలకు ప్రాధాన్యం: రోజా

వరంగల్: తెలుగుదేశం పార్టీలో బిసి మహిళలకు ప్రాధాన్యం ఇవ్వనున్నట్లు తెలుగు మహిళ అధ్యక్షురాలు, సినీ నటి రోజా అన్నారు. మహిళలకు ఇచ్చిన హామీలను కాంగ్రెస్ ప్రభుత్వం అమలు చేయడం లేదని, దీంతో కాంగ్రెస్ కు ఓటేసి తప్పు చేశామని మహిళలు బాధపడుతున్నారని, వారంతా తిరిగి తెలుగుదేశం వైపు వస్తున్నారని ఆమె అన్నారు. వరంగల్లులో బుధవారం సాయంత్రం జరిగే బిసి గర్జన నేపథ్యంలో ఆమె మీడియా ప్రతినిధులతో మాట్లాడారు.

తెలుగుదేశం ప్రభుత్వ హయాంలో బిసిలకు అన్యాయం జరిగిందనే విమర్శలో నిజం లేదని ఆమె అన్నారు. బిసి గర్జనకు పెద్ద యెత్తున ప్రజలు తరలి వస్తారని ఆమె చెప్పారు. పావలా వడ్డీకి రుణాలు ఇస్తున్నామని ప్రచారం చేసుకుంటున్నారని, నిజమైన లబ్ధిదారులకు ఆ రుణాలు ఇవ్వడం లేదని ఆమె అన్నారు. బెల్టు షాపులు విపరీతంగా పెరిగిపోయాయని ఆమె అన్నారు. బిసి హస్టళ్ల విద్యార్థులకు ఉపకార వేతనాలు సరిగా ఇవ్వడం లేదని ఆమె విమర్శించారు. బిసిలను అణగదొక్కుతున్నారని, బిసి అయిన ముఖేష్ దాన్ని చూస్తూ ముఖ్యమంత్రిని బలపరుస్తున్నారని ఆమె అన్నారు.