పెట్రోల్ ధరల పెంపు స్వల్పమే: ప్రధాని

న్యూఢిల్లీ: దేశంలో పెట్రోల్, డీజిల్ ధరలను స్వల్పంగానే పెంచామని ప్రధానమంత్రి మన్మోహన్ సింగ్ అన్నారు. ప్రభుత్వం సబ్సిడీలను కొనసాగిస్తూ పోతే ఆర్థిక వ్యవస్థ కుప్పకూలుతుందని ప్రధాని అభిప్రాయపడ్డారు. దేశ ప్రయోజనాలను కూడా పరిగణలోకి తీసుకోవాల్సిన అవసరం ఉందన్నారు. బిజినెస్ ఇండియా ఇయర్ బుక్ విడుదల సందర్భంగా ఇక్కడ జరిగిన వేడుక కార్యక్రమంలో ప్రధాన మన్మోహన్ సింగ్ పాల్గొన్నారు.

ముడిచమురు దిగుమతి ధరలు పెరిగిన పరిస్థితుల్లో ఈ నిర్ణయం తీసుకున్నామని తెలిపారు. వామపక్షాలు, ప్రతిపక్షాలు ఈ ధరల పెరుగుదలను వ్యతిరేకిస్తుండడంపై ప్రధాని మాట్లాడుతూ ఈ ధరల పెరుగుదల స్వల్పమేనని చెప్పారు. కేంద్ర ప్రభుత్వం గురువారం పెట్రోల్ ధరలను లీటరుకు రూ.2, డీజిల్ ధరను లీటరుకు రూ.1 పెంచిన సంగతి తెలిసిందే. కేంద్రం పెట్రోల్, డీజిల్ ధరలను పెంచడాన్ని వామపక్షాలతో పాటు ప్రతిపక్ష బీజేపీ వ్యతిరేకిస్తున్నాయి. ఈ ధరల పెంపు సామాన్యుడిపై ప్రభావం చూపుతుందని అవి అంటున్నాయి.