ఢిల్లీలో చంద్రబాబు అరెస్టు

న్యూఢిల్లీ: తెలుగుదేశం పార్టీ అధ్యక్షుడు నారా చంద్రబాబు నాయుడు ఢిల్లీలో అరెస్టయ్యారు. చంద్రబాబుతో పాటు సమాజ్ వాదీ పార్టీ నాయకుడు ములాయం సింగ్ యాదవ్ ను కూడా పోలీసులు అరెస్టు చేశారు. జంతర్ మంతర్ వద్ద నిషేధాజ్ఞలను ఉల్లంఘించినందుకు గాను పోలీసులు మంగళవారంనాడు వారిని అరెస్టు చేశారు. రైతు సమస్యలపై యుఎన్ పిఎ ఆధ్వర్యంలో జంతర్ మంతర్ వద్ద ధర్నా జరిగింది. ఈ ధర్నాలో చంద్రబాబు, ములాయం తదితరులు పాల్గొన్నారు.

ఆందోళనకారులు నిషేధాజ్ఞలను ఉల్లంఘించి పార్లమెంటు వైపు దూసుకెళ్లే ప్రయత్నం చేశారు. దీంతో పోలీసులు వారిని అరెస్టు చేశారు. ధర్నాలో నాయకుల ప్రసంగాల అనంతరం పార్లమెంటుకు ర్యాలీ తీయడానికి ప్రయత్నించారు. ర్యాలీకి అనుమతి లేకపోవడంతో పోలీసులు అరెస్టులు చేశారు. ఈ సమయంలో వాదులాట, తోపులాట జరిగింది. అరెస్టయిన వారిని మందిర్ మార్గ్ పోలీసు స్టేషన్ కు తరలించారు.