చంద్రశేఖరరావుపై ప్రైవేటు కేసు

కడప: తెలంగాణ రాష్ట్ర సమితి అధ్యక్షుడు కె చంద్రశేఖరరావుపై కడప జిల్లా ప్రొద్దుటూరు మొదటి అదనపు జ్యుడిషియల్ మెజిస్ట్రేట్ కోర్టులో సోమవారం ప్రవేటు కేసు దాఖలైంది. చంద్రశేఖరరావు వ్యాఖ్యలు ప్రాంతీయ విభేదాలు సృష్టించేలా, ప్రజలను రెచ్చగొట్టేలా ఉన్నాయని ప్రొద్దుటూరుకు చెందిన గోసంగి వెంకట సుబ్బారెడ్డి తన ఫిర్యాదులో ఆరోపించారు.

చంద్రశేఖరరావు ఈ నెల 19న రాయలసీమ ప్రజలను, నాయకులను రెచ్చగొట్టేలా మాట్లాడారని పిటిషన్ దారుడు పేర్కొన్నారు. వివిధ సెక్షన్ల కింద ఈ రాజద్రోహం కిందికి వస్తుందని ఆయన ఆరోపించారు. చంద్రశేఖరరావు ప్రత్యేక తెలంగాణ కోసం చేస్తున్న పోరాటానికి తాము వ్యతిరేకులం కాదని, ఆయన తెలంగాణ కోరుకునే పద్ధతి, చేసే వ్యాఖ్యలు అభ్యంతరకరంగా ఉన్నాయని తెలిపారు.